Қазақтың ойшыл ақыны Абай Құнанбайұлы «Мал жұтайды, өнер жұтамайды» деп өнерді жоғары бағалаған ғой. Ұлы ақын халқымыздың құндылығы саналған өнер туралы тағы бірде:

«Құлақтан кіріп, бойды алар

Жақсы ән мен тәтті күй.

Көңілге түрлі ой салар,

Әнді сүйсең, менше сүй» – деп үндейді. Хакім Абай өнерді үйренуге арқаланған жанды «Аңсаған шөлде су тапса, бас қоймай ма бастауға?» – деп таланттың талпынса тасты да жарып шығатынына күмән келтірмеген. Сондай жас талаптың бірі – Шелек ауылындағы балалар өнер мектебі домбыра аспабының 3-сынып оқушысы Амангелді Қожабек.

Қазақтың ұлттық аспабын ұлықтап жүрген Амангелдінің соңғы жетістігі – жақында халықаралық «International Вorovoeqrand royal festival – 2023» атты Германия және Ресей мемлекеттерінің ұйымдастыруымен Бурабай қаласында өткен байқау. Кіл таланттар қатысқан өнер сайысында Амангелді бас жүлдені иеленуі. Бұған дейін бірнеше байқаулардың жеңімпазы атанған Амангелді Қожабектің жетістігін ауыз толтырып айтуға болады. Атап айтсақ, халықаралық «Шабыт» атты көпжанрлы өнер байқауының бас жүлдегері атанды. Сондай-ақ, халықаралық «Жарық жұлдыз» балалар өнер байқауының, халықаралық «Mega konkurs» көпжанрлы балалар өнер байқауының, «Жас жұлдыз» атты республикалық балалар мен жасөспірімдер арасында өткен байқаудың, «Көктем шуағы» атты республикалық байқаудың, республикалық «Әз Наурызым – жаңа жылым» атты шығармашылық өнер байқауының, республикалық балалар мен жасөспірімдер  арасындағы «Жарқыра жұлдыз» өнер байқауының, халықаралық «Oner fest – 2023» балалар өнер байқауының бірінші орын және «Международного многожанрового конкурса День защиты детей» атты балалар өнер байқауының Гран-При иегері атанған.

Амангелдінің алғашқы ұстазы Думан Иманбаев домбыра аспабының қыр-сырын үйретіп, үш жылда көптеген күйді құлақ құрышын қандыра тартатын кәсіби деңгейге жеткізді. Қазіргі таңда Айдар Айтжанов ұстаздық етеді. Амангелдінің ендігі арманы, алға қойған мақсаты – Құрманғазы атасына ұқсаған керемет домбырашы болу. Сондай-ақ, келешекте өзі де ұстаз болып, балаларды қазақтың қара домбырасының құлағында ойнайтын  өнерге баулу.

Амангелді Елмұратұлы 2008 жылы 13 қыркүйекте Шелек ауылында дүниеге келген. Амангелдінің өнері нағашы атасынан дарыған екен. Нағашы атасы домбыраның сүйемелдеуімен кез келген әнді нақышына келтіріп айта беретін көрінеді. Қазір ол Шелектегі балалар өнер мектебінің 4-сыныбына өтті. Жалпы орта білімді Ақтоған мектебінде алып жүр. 9-сынып оқушысы әрі сол ауылда тұрады.

Сөз соңында Амангелдіге Абай атасы айтқандай:

«Әсемпаз болма әрнеге,

Өнерпаз болсаң арқалан.

Сен де бір кірпіш дүниеге,

Кетігін тап та бар, қалан!» – демекпіз.

Анарбек МӨКІШҰЛЫ.