Педагогикалық әдеп қағидаларының қолданыстағы заңнамаларын білу және талаптардың оқу үдерісінде сақталуына әдістемелік тұрғыдан бағыт беру мақсатында техникалық және кәсіптік білім беру ұйымдарының жас мамандары арасында «Педагогикалық әдеп қағидалары» атты дөңгелек үстел ұйымдастырылды. Есік медициналық колледжінде өткен шараға 40 оқу орнынан 45 жас маман қатысты.
Ең алдымен аталған дөңгелек үстелге қатысқан жас мамандардан педагогикалық әдеп жайлы білімдері мен өзіндік ойларын анықтау мақсатында арнайы сауалнама жүргізілді. Дөңгелек үстелдің пленарлық отырысында Алматы облысы оқу-ағарту және бюджеттік ұйымдары қызметкерлері кәсіптік одағы бірлестігі төрағасының орынбасары Қайратбек Асылханов «Педагогикалық әдеп қағидаларының қолданыстағы заң талаптары» тақырыбында таныстырылымын ұсынып, «Педагог мәртебесі» заңының қолдану саласындағы түрлі жағдайларды мысалға келтіре отырып, түсіндірді. Одан кейін сөз алған облыстық әдістемелік орталығының техникалық және кәсіптік бөлім басшысы Шынар Исаханова өзінің кәсіби біліктілігін шығармашылықпен ұштастырып, зор нәтижеге жеткен педагогтер тәжірибесін «Шығармашыл педагогтен бір тілек...» атты бейнежазбалар арқылы жас мамандардың назарына ұсынды.
Дөңгелек үстелдің тәжірибе алаңында Есік медициналық колледжінің әдіскері Ақбөпе Бегімбетоева «Шеберлікке бір қадам атты» шеберлік сабағын жүргізді. Жас мамандар шеберлік сабақ барысында педагогикалық әдеп қағидаларының оқу үдерсінде сақталуын ситуациялық тапсырмалар арқылы жан-жақты талқылады. Ал педагогтардың кәсіби әрекетіндегі әдеп қағидаттарының маңызын сұхбат барысында Есік гуманитарлық-экономикалық колледжінің педагогика, психология пәндерінің оқытушысы Алма Сырғабаева талқылады. Іс-шара медициналық колледждің базасында ұйымдастырылғандықтан колледж ұжымы күнделікті өмірде түрлі әрекеттер арқылы көрініс беретін аурулардың алдын алу мақсатында «Дәрідік шөптердің пайдасы және әр-түрлі аурулардың алдын алу» тақырыбында таныстырымды, «Жүрек-өкпе реанимациясы» тақырыбында тәжірибелік сабақтарды ұсынып, оны өмірде дұрыс пайдаланудың бағыттарын көрсетті. Сондай-ақ шығармашыл педагогтердің әдістемелік өнімдеріне ұйымдастырылған көрме жұмысы да жас мамандардың ізденісін жетілдіруге бағытталды. Дөңгелек үстелді қорытындылаған ұйымдастырушылар шара мазмұнының тиімділігін тілдеріне тиек етті. Сонымен қоса, кедергілерін анықтау бағытында кері байланыс жүргізіп, жауаптардың қорытындысы бойынша алдағы жұмыстардың міндеттерін айқындады.
Е.АСЫЛ.
Еңбекшіқазақ ауданында облыстық құмай тазылар жарысы өтті. Облыстық дене шынықтыру және спорт басқармасы, бұқаралық спорттық іс-шараларды өткізу орталығы ұйымдастырған аламанға аймақ аумағындағы 7 ауданнан 40-қа жуық құмай тазы қатыстырылды.
Жарыстың ашылу салтанатында сөз алған аудандық мәдениет және тілдерді дамыту, спорт бөлімінің басшысы Ермек Самсыбеков қатысушыларды құттықтап, оларға сәттілік тіледі. Ал спорт ардагері Аманбек Саматов додада бақ сынаушыларға ақ бата беріп, ізгі тілегін жеткізді. Қашқан аң құтыла алмайтын иттер көлікке байланған шырғаны қуып, бір шақырым қашықтыққа жүгірді. Әр топтан қара үзіп алда келген тазылар финалдық кезеңге өтті. Құйындай жүйірік құмай тазыларының жарысында Қарасай ауданынан келген Манат Ерқанаттың «Құмай» атты тазысы топтан озып дараланса, Еңбекшіқазақ ауданынан қатысқан Ақтілек Кәдіржанның «Сары құмай» атты тазысы екінші орынға ие болды. Манат Ерқанаттың сөзінше, тазысы бұдан бұрын өткен бірнеше додада да топ жарып үлгеріпті. Енді жүлде алған жүйіріктер 7 қазанда Астанда өтетін «Асыл қазына» атты республикалық тазылар жарысында облыс атынан сынға түсетін болады. Жарысқа жиналған итбегілердің сөзінше, тазы иттер дегдар, адам тәрізді талғампаз, кез келген дүниені жей бермейді. Қарны аш болса да, аштығын білдірмейтін төзімді жануар. Үйретіп баулыған кезде тазының мінез-құлқы тұрақты болуына баса назар аударған жөн. Тазыны жас-тай үйреткен дұрыс. Өйткені бір айлық күшіктің өзінде тазыға тән белгілері біліне бастайды. Үйрету осы шамадан басталады. Жарыста қарғы бау таққан тазыларды жетелеп жүрген қаршадай балаларды көріп, атадан қалған асыл өнердің оты сөнбейтініне шүбәсіз сендік.
Е.АСЫЛ.
Футболдан он екінші аудан біріншілігінің жабылу салтанаты өтті. Үш айға созылған аяқдоп аламанына 8 команда қатысып, екі айналым бойынша өз бақтарын сынаған болатын. Салтанатты шараға аудандық мәслихат төрағасы Бекет Ахметов бастаған құрметті қонақтар қатысты.
Жарыстың ашылу салтанатында қатысушыларға сәттілік тілеген Бекет Ахметов футбол ойынының жастар арасындағы маңызына тоқталып өтті.
– Біздің аудан бірнішілігінің өзіндік тарихы бар. Осы доп додасы алғаш басталған жылдары санаулы ғана команда ойнайтын. Кейін 30-дан астам команда бақ сынаған кездері болды. Пандемия кезінде үзіліп қалған футбол жарысы қайта жалғасын тапты. Келер жылы бұдан да көп командалар аудан біріншілігіне қатысады деп сенеміз. Барлық аяқ допшыларына сәттілік тілеймін, – деді мәслихат төрағасы.
Байрақты бәсекенің қорытындысы бойынша Қазақстан ауылдық округінің командасы турнир жеңімпазы атанып, арнаулы кубокпен және 100 мың теңге ақшалай сыйлықпен марапатталды. Жүлделі екінші орынға ие болған Көктөбе ауылының командасы күміс медальмен және 70 мың теңге ақшалай сыйлық алса, үздік үштікті түйіндеген Алмалы ауылының футбол командасына қола медаль және 50 мың теңге ақшалай сыйылық табысталды. Жеңімпаздар мен жүлдегер командаларға мәслихат хатшысы Бекет Ахметов пен аудандық мәдениет және тілдерді дамыту, спорт бөлімінің басшысы Ермек Самсыбеков, спорт ардагері Аманбек Саматов бастаған құрметті қонақтар кубок және медальдарды табыстады.
Е.АСЫЛ.
Аудан әкімдігінің кіші мәжіліс залында ішкі саясат бөлімінің ұйымдастыруымен және «Адам және қоғам қоғамдық ұйымының қолдауымен діни бірлестік жетекшілерінің» отырысы өтті.
Аудан әкімі Алтай Досумбаевтың төрағалық етумен өткен отырысқа көрнекті діни қайраткер, Қазақстанның тұңғыш бас мүфтиі, Алматы облысының құрметті азаматы Рәтбек қажы Нысанбайұлы, мәслихат төрағасы Бекет Ахметов, аудан әкімінің орынбасары Қуат Ақшабаев және аудан аумағындағы діни бірілестіктердің жетекшілері қатысты. Ең алдымен аудан әкімі Алтай Машикұлы отырыстың мән-маңызына тоқталды.
– Өздеріңізге белгілі, еліміздің дін саласындағы саясатын тиімді жүргізу баршамызға ортақ міндет. Осы тұста жаһандық және аймақтық үдерістер ескерілуге тиіс. Бұған немқұрайды қарауға болмайды. Елімізде 130-дан аса этнос өкілдері мекен етуде, сәйкесінше, 18 конфессия жұмыс атқаруда. Дегенмен, халқымыздың басым бөлігі дәстүрлі діндерді ұстанғандықтан ұлттық құндылықтарымызды кеңінен насихаттау үнемі күн тәртібінде тұруы керек.
Бүгінгі таңда ауданымызда 54 этностан құралған 300 мыңнан аса тұрғын тату-тәтті тұрып жатыр. Осы орайда, аудан аумағында 8 конфессияның құрамына кіретін 93 діни бірлестік тіркеліп, қолданыстағы заңдарға сәйкес өз жұмыстарын атқаруда. Атап айтатын тағы бір үлкен мәселе, аудан аумағында етек жайып жатқан теріс пиғылды діни ағымдардың көбеюі. Аудан тұрғындарын, әсіресе, жастарымызды жат ағымдардың кесапатынан сақтау бәріміздің ортақ жұмысымыз екені айтпаса да түсінікті. «Бірлесе көтер-ген жүк жеңіл» демекші осы мәселе бойынша бір жағадан бас, бір жеңнен қол шығарсақ жағымды нәтижеге қол жеткіземіз деп сенемін, – деді аудан басшысы.
Отырыста баяндама жасаған аудандық ішкі саясат бөлімінің басшысы Дархан Ахметов өңіріміздегі діни ахуалға тоқталды. Оның сөзінше, жыл басынан бері 1500-ге жуық тұрғындардың қамтылумен 38 іс-шара ұйымдастырылған. Аталған шараларда жастарға түсіндіру жұмыстарын жүргі-зуге басымдылық берілген. Көбінде кездесулерге жоғары санаттағы мамандар шақырылған.
– Аудан бойынша деструктивті діни ағым өкілдерінің жабық тізімінде 196 азамат тіркелген. 176 азаматқа профи-лактикалық оңалту жұмыстары жүргізілді. Аталған жұмыстар нәтижесінде «Сәләфия» ағымы бойынша 38 азамат, «байсалды немадхалиттер» бойынша 26 азамат, онан өзге де жат ағымдағы 2 азамат дәстүрлі ханафи мазхабына оралған. Ауданда орналасқан деструктивті діни ағым өкілдерінің көпшілігі Есік қаласында, Ават, Асы, Рахат, Шелек, Көктөбе, Бәйтерек, Қазақстан, Балтабай ауылдық округтеріне орналасқан. Бүгінде аталған ауылдық округтер-дің аумағында ақпараттық-түсіндіру жұмыстарын ұйымдастыруға басымдылық берілген, – деді Дархан Ахметов.
Аталған отырыста көрнекті діни қайраткер Рәтбек қажы Нысанбайұлы да өз ойын ортаға салды. Еліміздің тұңғыш бас мүфтиі дінге бетбұрыс барын, дегенмен, исламды əлі де толық түсінбеген жастарды өзге секталар, ағымдар, діндер жарты жолдан бұрып алып бара жатқандығын айтты.
– Бұл – жақсылық емес. Осының қалай да алдын алуымыз керек. Зайырлы мемлекеттің де заңы бар. Зайырлы мемлекет екен деп баса-көктеп кіре беруге болмайды ғой. Сондықтан, оларды ауыздықтайтын заң болуы керектігін қолдаймын. Мен бас мүфти болып тұрған кезде де ондай ағымдардың талайы келді. Оларды барынша елімізге жолатпауға тырыстым. Қазір бізге де қайта айналып келе бастағаны байқалады. Əлі де кеш емес, олардың аяғына тұсау салатын заң керек. Миссионерлерден əр қазақ, əуелі өзін, сосын отбасын, ағайын-туысы мен жора-жолдасын сақ-тауы тиіс. Бізді азғырушылар көп. Ел болсын деп ешкім қолдамайды. Сондықтан, қа-зақ халқы өзімізді-өзіміз қорғауға тиіспіз, – Рәтбек қажы Нысанбайұлы.
Ауданымыздың діни ахуалының тұрақтылығын сақтауда елеулі еңбек етіп жүрген дін қызметкерлері де аз емес. Жиналыс соңында аудан тұрғындары мен жастарды теріс пиғылды діни ағымдардың кесапатынан сақтап, көптеген игі істердің бастамашысы болып, ауданымыздағы діни, мәдени іс-шараларға белсенді қатысып жүрген азаматтарға аудан әкім арнайы алғыс хаттар табыстады.
Е.АСЫЛ.
Ел Президентінің Жарлығымен 2013 қарашада жұмысшы мамандықтарына құрмет көрсету дәстүрін жалғастыру, ерте жастан еңбектенуге машықтандыру мақсатында еңбек күні белгіленгенді. Мамандықтың жақсы-жаманы болмайтынын, жастар арасында жұмысшы мамандықтарын насихаттап, еңбек қоғамын құру – бұл атаулы күннің басты мақсаты болды.
Жақында «AMANAT» партиясының «Еңбек адамы» партиялық жобасы аясында алты түрлі мамандықта даярланып жатқан Шелек политехникалық колледжінің студенттерімен ауылдың танымал ардагер ақсақалдары, аудандық мәслихаттың депутаттары бас қосып, адал еңбектің, соның жолында маңдай терді төккен бейнеттің жемісті болатыны туралы сөз қозғалды.
Болашақ маман иелерімен өткен кездесуде ауылдық ардагерлер кеңесінің төрағасы, ауданның құрметті азаматы Әбілбек Айтақынов адал еңбек еткен адамның тапқан наны әрқашан да тәтті болатынын, жұмысшы деген мәртебелі мамандық екенін, қазіргі таңда электрик, дәнекерлеуші, техника тілін меңгерген, басқа да мамандық иелеріне кез келген жерден жұмыс табылатынын, табыстары да қомақты әрі қат екеніне бірнеше мысалдар келтіріп, әңгімелеп берді. Ал Алматы облысының құрметті азаматы Елеусіз Сұлтанғазиев өзінің қиын кезде өткен балалық шағынан, қарапайым жұмысшы болудан ауданды басқарған кезге дейінгі өмірін, жастайынан жұмысқа қалай тәрбиелегенін, еліне еңбегі сіңген қайраткерлерді мысалға келтіріп айтқан әсерлі әңгімесін жастар ұйып тыңдады. Қазіргі жастардың қол еңбегінен тыс қалып, интернетке тәуелділіктері артып, виртуалды әлемге еніп кеткендерін байқамай, жат қылықтарға әуестеніп, тіпті суицид жасауға да барып жатқан оқиғаларды мысалға келтірді.
Одан кейін аудандық мәслихаттың депутаттары Сайра Базылбекова, Ринат Беков және Камшат Қарағұлова еңбек адамының елге сыйлы, құрмет иесі болатынын әңгімелеп берді. Колледж директоры Қуат Дүйсебаев кездесуге келген қонақтарға ризашылығын білдіріп, Елеусіз бен Әбілбек ақсақалдарға шапан жапты. Ел ағалары жастарға баталарын берді.
Анарбек БЕРДІБАЕВ.
24-25 қыркүйек күндері аралығында Есік қаласындағы орталық спорт кешенінде қазақ күресінен ерлер мен әйелдер арасында Алматы облысының чемпионаты өтті. Аталған күрес додасына
7 командадан 100-ге жуық спортшы қатысты.
Жарыстың шымылдығын ашқан облыстық Дене шынықтыру және спорт басқармасының басшысы Ерболат Сарабеков спортшыларға сәттілік тіледі.
– Бүгінгі таңда қазақ күресі елімізде, оның ішінде өңірімізде де белсенді дамуда. Мемлекет басшысы бұқаралық спортты дамыту қажеттігін аз айтқан жоқ. Еліміздің барлық жерлерінде спорттық инфрақұрылым қарқынды дамып келеді, спортпен белсенді айналысатын адамдар көбейді. Бүгінгі күрестен топ жарғандар, ертең әлемдік байрақты бәсекелерде ел намысын қорғайды деп сенемін, – деді Ерболат Сарабекұлы.
Жарыс қортындысы бойынша, Нұрсұлтан Курманов (55 кг, Жамбыл ауданы), Бахтияр Сырлыбай (60 кг, Жамбыл ауданы), Азамат Ықын (66 кг, Талғар ауданы), Маулен Рысдаулетов (74 кг, Іле ауданы), Собир Сапарбаев (82 кг, Қонаев қаласы), Бақыт Гумаров (90 кг, Жамбыл ауданы), Ильяс Мырзаханов(100 кг, Еңбекшіқазақ ауданы), Адибан Өріс (100+кг, Қарасай ауданы) чемпион атанды. Ал әйелдер арасында Аяжан Азим (48 кг, Іле ауданы), Ақниет Жәнәбіл (52 кг, Талғар ауданы), Айда Жалғасбай (56 кг, Талғар ауданы), Гүлім Елубай (60 кг, Жамбыл ауданы), Назерке Даулетжан (65 кг, Жамбыл ауданы), Аружан Жақсылықова (70 кг, Талғар ауданы), Шұғыла Мақсатқызы (75 кг, Талғар ауданы), Ақдана Ақбастау (77 кг, Талғар ауданы) алтынан алқа тақты.Жеңімпаздар мен жүлдегерлер медаль және тиісті грамоталармен марапатталды. Айта кетейік, үздіктер келесі жылы өтетін ел чемпионаттарында аймақ намысын қорғайтын болады.
Е.АСЫЛ.
«AMANAT» партиясы Еңбекшіқазақ аудандық филиалының ұйымдастырумен «Еңбек адамы» партиялық жобасы аясында Еңбек ардагерлері, аудандық мәслихат депутаттары, фракция мүшелері С.Базильбекова, К.Карагулова және Р.Беков, Шелек политехникалық колледжінің директоры Қ.Дуйсебаев жастарды еңбекке баулу мақсатында колледж студенттерімен кездесу өткізілді.
Еңбек күнін мерекелеудің басты мақсаты – еңбекке деген құрметті жандандыру, жұмысшы кәсіптерінің мәртебесі мен беделін арттыру, отбасылардағы еңбек мәдениеті мен жұмысшы әулеттерінің дәстүрлерін жаңғырту, еңбек өнімділігін ынталандыру, оған жастардың назарын аудару, еңбек ұжымдарын біріктіру.
Сондай-ақ Мемлекет басшысы Қасым-Жомарт Тоқаев «Әділетті Қазақстанның экономикалық бағыты» атты Қазақстан халқына Жолдауында ұлттың жаңа сапасын қалыптастыру қажеттігі туралы айта келіп: «Барлық азаматтар, әсіресе жастар ең жақсы қасиеттер - бұл қоғамның құндылықтарының біртұтас жүйесін жасайды. Әрбір адам отансүйгіш, білімді, еңбекқор, тәртіпті, жауапкершілікті, әділетті, үнемшіл, жауапты болса, біз үшін қол жетпес биіктер болмайды. Абайдың «Кемел адам» туралы ілімінен бастау алатын «Адал азамат» ұғымының терең мағынасы осында.
Облыстың тоғыз ауданы, сондай-ақ Қонаев қаласы облыстың ауыл шаруашылығы өнімдерін ұсынады.
Бүгінгі таңда өнімдердің 52 түрін – ет-сүт, шұжық, балық өнімдері, ұн, жарма, май, әрине, жемістер, көкөністер, бал, ұлттық сусындар және т.б. құрайды. Ал науқанан күтілетін табыс екі жүз миллион теңгеден асуы тиіс.
Аталған жәрмеңке Жетісу облысының аграршыларымен бірлесіп өткізіледі.
Орталықтандырылған ұйымның және жәрмеңкеде тегін орындарды ұсынудың арқасында тауарлардың бағасы нарықтық бағадан 10-15 пайызға арзан. Елордаға өнім тасымалдайтын көліктердің жалпы саны 25-30 көлікті құрайды.
Облыстық жәрмеңкелер күздің басынан басталды және біздің аймақ өз өнімдерін алғашқылардың бірі болып ұсынбайды. Биылғы жылы Түркістан облысы бірінші болып, астаналықтар қымыз бен шұбат әкелгендерін жоғары бағалады. Ал біздің өңірдің алдында Қызылорда облысы мен Батыс Қазақстанның жәрмеңкелері өтті.
Іле ауданы шамамен 30 тонна жинады. Көкөністер, жемістер, бақша дақылдары, ет және мұздатылған тауық еті.
Еңбекшіқазақ ауданы жүздеген килограмм жүзім, баклажан, бұрыш, қырыққабат және жарты тоннадан астам бал дайындап, осындай көлемді ұсынды. Негізгі ассортимент - Талғар ауданының алмалары «апорт», «золотое превосходное», «кандиль», «американка» сорттары болды.
Жалпы, Астанадағы тұрақты жәрмеңкелер тауарларды өткізу орнына ғана емес, сонымен қатар жергілікті өнімнің сапасы мен әртүрлілігін бағалаудың өзіндік көрсеткішіне айналуда. Бұл сонымен қатар, өндірушілерге астаналық тұтынушылардан тікелей кері байланыс алуға және одан әрі дамуға мүмкіндік береді.
Бүгін Алматы облысында Шанхай ынтымақтастық ұйымы Жастар кеңесінің аясында «Жастар кеңістігі: Әділетті әлем және келісім» халықаралық жастар саяси лагерінің жұмысы басталды.
Ұйымдастырушы – «AMANAT» партиясының «Жастар Рухы» Жастар қанаты.
Қазақстанның барлық өңірінен келген 300-ден астам делегат, сондай-ақ Беларусь, Қытай, Қырғызстан, Тәжікстан, Ресей Өзбекстан және Үндістаннан келген қонақтар 4 күн бойы «Bir Tolqynda» диалог алаңдарының, тақырыптық панельдік сессиялар мен оқыту семинарларының жұмысына қатысады.
Осы жылдың шілде айында Қасым-Жомарт Тоқаев ШЫҰ-ға мүше мемлекеттер басшылары кеңесінің отырысында сөйлеген сөзінде, «үш зұлым күшке»: трансұлттық ұйымдасқан қылмысқа, заңсыз есірткі айналымына және киберқылмысқа қарсы күреске баса мән берілетінін айтқан болатын.
Сондай-ақ, Қазақстан Президенті цифрлық технологияларды дамытудың өзектілігіне және экология саласындағы өзара іс-қимылды нығайтуға назар аударды.
«Жастар Рухы» төрағасының орынбасары Ақерке Искандерова:
«Ең алдымен, Қазақстан Президенті белгілеген күн тәртібіне сүйене отырып, біз басқа елдердің жастар белсенділерімен коммуникациялық байланысты нығайтамыз. Жастардың әлеуетін тиімді пайдалану және олардың күш-қуатын қазіргі жағдайды жақсартуға және сенімді болашақты қалыптастыруға бағыттау маңызды».
Сонымен қатар, бүгін қатысушыларға арнап «QaiTuYu» психоәлеуметтік оңалту және бейімдеу орталығының директоры Ғалия Назханова және «QaiTuYu» психоәлеуметтік оңалту және бейімдеу орталығының әлеуметтік қызметкері Ерлан Тәжібаев «Есірткіге жол жоқ» бағыты бойынша оқыту сессиясын өткізді.
Сессия барысында қатысушылармен сұрақ-жауап алмасып, пікірлер ортаға салынды.
Мемлекет басшысы Қасым-Жомарт Тоқаев ауыл шаруашылығын дамытпай бәсекеге қабілетті экономика құру мүмкін емес екендігіне әркез халық назарын аударып келеді. Расымен де ауыл шаруашылығы секторларының қанат жаюына мүмкіндік беретін болсақ импортқа тәуелділік бәсеңдеп, елдің экономикасы дами түсетіндігі жасырын емес. Ол үшін ауыл шаруашылық-техникалары өндірісін де назардан тыс қалдырмау қажет. Ауыл шаруашылығы министрлігінің 2021 жылғы дерегіне қарасақ, еліміздегі ауыл шаруашығы техникасының 80 пайызы тозған. Сондықтан шұғыл жаңарту мәселесін қолға алу қажет.
Ауыл шаруашылығы – аудан экономикасының басым бағыттарының бірі. Өңіріміздің құнарлы топырағы ауыл шаруашылығы өнімдерін өсіруге қолайлы. Сол себепті де, ауыл шаруашылық, әсіресе бау-бақша техникаларына сұраныс тіптен жоғары. Өйткені, барлық жұмыс арнайы техникалармен атқарылады. Ал олардың құны егін адамы үшін әркез қолжетімді емес. Мұндайда кәсіпкерлік бағытта құрылған арнайы құрылымдар шаруаларға көмек қолын созып келеді. Соның бірі – «Service4agro» жеке кәсіп-керлігі. Есік қаласында тұратын инженер, өнертапқыш Әсет Тұрысбеков 5 жылдан бері шағын көлемдегі ауыл шараушылық техникаларын жасаумен айналысып келеді. Ол жеткішілік ететін цехта бау-бақша шаруашылығына пайдаланылатын 10-ға жуық техника жасалады. Оның негізгісі – сұйықтық шашқыш құралдар. – Біз жасаған құрылғылардың қолдану аясы кең. Оларды бау-бақшаларды суару мен дәрілеуге, өрт сөндіруге, өнім жинауға пайдалануға болады. Техниканы жасауға керекті бөлшектердің 80 пайызы еліміздікі, тек 20 пайызын ғана шетелдерден сатып аламыз. Біз құрастырған техникаларда көптеген мүмкіндіктер қарастырылған. Яғни, шетелдік техникаларда қандай функциялар бар, бізде сол деңгейде жасауға күш саламыз. Жасаған техникалардың сапасына бір жыл кепілдік береміз. Сонымен қоса, бұзылған ауыл шаруашылық техникаларын да жөндеуден өткіземіз. Құрылғыларымызды өзіміз жобалаймыз. Сапа жағын қатты қадағалаймыз. Сондықтан Алматы облысы мен өзге өңірлерден үнемі тапсырыс қабылдап келеміз. Әрине, техника жасау оңай шаруа емес. Сол үшін көптеген сынақтар мен тәжірибелер жасаймыз. Тәжірибе сыннан өткеннен кейін ғана, біз оны өндіріске пайдаланамыз. Біз өндірген техникалар пайдалануға өте тиімді – дейді кәсіпкер Әсет Тұрысбеков.
Бүгінде шағын цехта екі жоғары санаттағы маман қызмет етеді. Олар нағыз өз ісінің майталмандары. Шеберлер жаңа техника жасауға жаны құштар екендіктерін айтады. Әр жыл сайын аудан аумағындағы техникалық коллеждерде білім алатын кейбір студенттер осында өндірістік тәжірибеден өтеді екен. Ондағы мамандардың сөзінше, мехника, машина жасау, дәнекерлеу сынды мамандықта оқитын студенттер өндіріс цехында жұмыс істеп, жақсы тәжірибе жинақтап қайтады. Сарапшылар егер өндіріске бет бұрар болсақ, техникалық мамандар дайындауымыз керек екендігін айтады. Шындығы сол, елімізде инженерлер, механиктер, токарьлар жетіспейді. Мұндай мамандар даярлануда. Кәсіптік білім беру оқу орындарында оқытылуда. Олар өндірістік тәжірибеден өтетін жер жоқ. Өндірісте қалып, жұмыс жасап үйрену керек. Саусақпен санарлық өндіріс орындары бар. Алдымен жұмыс, өндіріс орындарын ашпай болмайды. «Service4agro» сынды шағын кәсіпорындар бұл қиындықты шешуге өз септігін тигізе алады. Сол себепті кәсіпкер Әсет Тұрысбеков мемлекет осы бағытқа қолдау көрсету қажет деп санайды. Білікті маманның сөзінше, болашақта кәсіп ашамын деушілерге мемлекет тарапынан міндетті түрде қолдау болып, пайызсыз несие берілсе, жас кәсіпкер аяғынан тұрып кетеді. Басында идеясы көп, бірақ қаржысы жоқ ынталы азаматтар бар.
Кәсіпкерліктің барлық саласына кейінгі жылдар өте ауыр тиді. Оның салалары бір-бірімен тығыз байланысты. Бірінің затын бірі алады деген секілді. Сондықтан барлығы қиналды. Бізде кәсіптің қызмет көрсету түрі жақсы жұмыс жасайды да, өнім шығару жағы кемшін. Өйткені, өндіріске кез келген адам бара бермейді. Ол үлкен қаржыны, табандылықты талап етеді. Тіпті үлкен олигархтардың өзі өндіріс ашуға құлықсыз. Одан пайда көлемі аз. Дегенмен, өндіріссіз де күн жоқ. Ал ел экономикасының маңызды тет-тіктерінің бірі саналатын ауыл шаруашылық саласына қажетті өндірістің маңызы тіптен зор.
Е.АСЫЛ.
Аудан әкімі Алтай Досумбаев джиу-джитсудан жастар мен жасөспірімдер арасында Әлем чемпионатында жүлде алған жеңімпаз спортшыларды марапаттады.
Өңір басшысы чемпиондарды марапаттау барысында
– Сіздердің жетістіктеріңіз жастарға өнеге. Әрине бұл жеңіс оңайлықпен келген жоқ. Осы жетістіктің артында қаншама еңбек, төгілген тер, ұйқысыз түндер жатыр. Ең бастысы жүлдегерлеріміз жеңіске деген жігер мен темірдей төзімділік танытып, өздеріне артылған үміт пен сенімді ақтады. Аудан спорты қанатын кеңге жайып келеді. Біз қашан да өңір спортын дамытуға күш саламыз. Әлемдік додаларда жеңіс туын желбірететін спортшыларымыз көп болсын! – дей келе, жүлдегерлерге арнайы алғыс хат және естелік сыйлықтарды табастады. Өз кезінде жеңіс тұғырынан көрінген жеткіншектер бұдан да биік белестерді бағындыруға құлшынатындықтарын айтты. Ауданымыздың түлектері Амин Арсамаков пен Милана Мансурова 21-25 тамыз аралығында Астанада алғаш рет өткен джиу-джитсудан жастар мен жасөспірімдер арасында Әлем чемпионатының қола жүлдегері атанған еді. Жеңімпаздарымыз Амин Арсамаков Есік қаласында, ал Милана Мансурова Ават ауылында тұрады. Айта кетсек, бұл сында Қазақстан атынан 194 спортшы ел намысын қорғады. Қазақстандық спортшылар байрақты бәсекеде 13 алтын, 19 күміс, 37 қола медаль алып, жалпы командалық есепте ІІІ орын алды.
Е.АСЫЛ.
Өткен аптада Есік гуманитарлық-экономикалық колледжінде аудандық қоғамдық келісім орталығының ұйымдастыруымен, облыстық ішкі саясат басқармасының қолдауымен «Менің ауылым – Қазақстанның бір бөлшегі» атты этносаралық бірлік кездесуі өтті. Шараға спикер ретінде Қазақстан халқы Ассамблеясының мүшесі, филология ғылымдарының кандидаты, профессор, «Қазақстан Республикасының еңбек сіңірген қайраткері», «Алматы облысының Құрметті азаматы», қоғам қайраткері, тіл жанашыры Осман Асле Әлиқызы арнайы шақырылды.
«Тілдік және этникалық белгілері бойынша арнамыс пен қадір-қасиетті қорлаудың кез келген нысандарына жол бермеу» жобасының аясында өткізілген кездесуге облыстық ішкі саясат басқармасының басшысы Бота Елеусізова, Қазақстан халқы Ассамблеясы жанындағы ақсақалдар, аналар және медиация кеңестерінің төрағалары мен мүшелері, этно-мәдени орталықтардың төрағалары мен мүшелері, аудан тұрғындары, жастар қауымы қатысып, тағылымды әңгімемен сусындады.
– Бүгінгі таңда Қазақстан бейбітшілік пен келісімнің қазақстандық үлгісін әлемге танытушы елге айналып отыр. Әрбір қазақстандық азамат үшін ұрпақтар сабақтастығы арқылы тарихи қалыптасқан татулық, сенім мен тең құқықтылық ең маңызды қасиет. Сонымен қатар, Қазақстан халқы Ассамблеясы этносаралық және конфессияаралық қатынастар саласындағы мемлекеттік саясатты жүзеге асырушы маңызды құралға айналып, елімізде тұрмыс кешіп отырған барлық этностардың өзара тең құқықты қатынасын қамтамасыз етуші алаң рөлін атқаруда – деп, еліміздің ынтымақтастық пен бейбітшіліктің символына айналғанын атап өткен Бота Серікқызы алғашқы сөз кезегін кездесудің құрметті қонағы Асле Османға ұсынды.
– Баршаның баласын бауырына басқан қазақтың дархандығы даласынан дарыған, тектілікке бабасынан жарыған. Солақай саясаттың құрбаны болып еріксіз жер аударылған бізді жатсынбай, қолындағы қара нанын бөліп берген Алаш жұртының бұл әрекеті – үлкен тәлім, тәрбие. Ұлы сөзін ұлтына, жылы сөзін жұртына арнаған қазақ халқы Сталин жылатқан ұлттарды жұбатқан. Осындай дархан халыққа деген біздің сеніміміз де, түйсігіміз, оған деген ықыласымыз да, ниетіміз де өзгеше болуы керек. Сол өзгешелікті бірлікте, достықта, татулықта ғана көрсете аламыз – деген Асле Осман елімізді гүлдендіруде бәріміз жұмыла еңбек етуіміз қажеттігін айтты.
Ұлты әзірбайжан болса да, жүрегі қазақ деп соққан Асле Әлиқызы кездесуге келген жастарға еңбекқор болу керектігін айтты. Сөзіне сүйенсек, қазіргі уақытта білім ордасында болсын, отбасында болсын баланы еңбекке баулу жағы ақсап тұр. Бұл – бүгінгі қоғамның ащы шындығы. Ал еңбектенбеген халық ешқашан дамымайды. Еңбек – кемел келешектің, жарқын болашақтың кепілі. Осыны айтқан Асле Әлиқызы студент жастарға көп кітап оқып, үлкендерден тәлім-тәрбие алып, білімді шыңдап, жетістікке жету жолында аянбай еңбек ету керектігін жеткізді.
Тақырыпқа сай әңгіме тетігін ағытқан кездесудің құрметті қонағы ауылдың бүгінгі тыныс-тіршілігін сипаттап, ауыл – алтын қазық екенін айтты:
– Тумысынан таза, арамдықтан ада, қиянаттан шет, ешкімді жатсынбайтын, бөлмейтін-жармайтын, бар-шаның баласын бауырына басқан, аразды татуластырған, алысты жақындастыратын бір халық болса, ол – қазақ халқы. Мен үшін қазақ халқы бәрінен жоғары. Бүгінде осы құндылықтың барлығы қазақстандықтардың бойында сақталған. Әсіресе, ауыл жұртының. Тәлім мен тәрбиенің, инабаттылық пен ибалықтың, салт пен дәстүрдің, еңбек пен адал тіршіліктің алтын бесігі болған ауылдарымыз өз құнын жоғалтпақ емес. Сондықтан «Менің ауылым – Қазақстанның бір бөлшегі» деген бүгінгі кездесудің тақырыбы ұтымды қойылған. Ауыл – елдің жүрегі, қазақылықтың қайнар көзі – деді Асле Осман.
Кездесу барысында этносаралық татулық және өзге де қоғамдық бірлестіктердің, этносаралық коммуникацияның тиімді құралдарын қалыптастыруға жаңа серпін берумен қатар, мемлекеттік тілді құрметтеп, қоғамдағы рөлін арттыру, жастарға патриоттық бағыттағы тәрбие беру мәселесі көтерілді.
Облыстық ішкі саясат басқармасының басшысы Бота Серікқызы облыс аумағындағы этносаралық тұрақтылық жайында сөз қозғап, статистикалық мәліметтермен бөлісті. Сонымен қатар, сөз кезегін алған ақын-жазушы Шаяхмет Құсайынұлы, аудандық аналар кеңесінің төрайымы Роза Исатаева, ақ жаулықты аналар мен ақсақалдар, аудан жастары Асле Әлиқызына ризашылығын білдіріп, алғыстарын айтты.
С.НҰРАДИН.
Жуырда «AMANAT» партиясы Алматы облыстық филиалының төрағасы Қуат Байғоджаев Шелек ауылындағы гимназияның мәжіліс залында мұғалімдер мен ата-аналармен кездесіп, Мемлекет басшысы
Қасым-Жомарт Тоқаевтың «Әділетті Қазақстанның экономикалық бағдары» атты Жолдауын жан-жақты түсіндіріп, жақсылық жолындағы жаңғыруға арналған жұмыстармен таныстырды.
Жиынды «AMANAT» партиясы аудандық филиалының төрағасы Бағ-дат Рахимов ашып, Қуат Сұлтанұлы Жолдаудағы елдің әлеуметтік-экономикалық дамуы жолындағы ай-қындалған мәселелерді өз сөзіне арқау етті. Бүгінде ел Президентінің бастамаларының басым бөлігі жүзеге асып жатқанын, мысалға, мұғалімдер мен дәрігерлердің жалақылары айтарлықтай көбейгенін, тұрғын үй мәселесі шешімін тауып жатқанын айтты.
Жолдауда көрсетілген міндеттің бәрі үш жылдың ішінде орындалуға тиіс екенін тілге тиек етті.
Мәселен, «Жер аманаты» жобасы бойынша игерілмей не заңсыз берілген жерлер мемлекет меншігіне қайтарылып жатқанын, «Ауыл аманаты» бағдарламасымен облыс бойынша атқарылып жатқан істерді мысалға келтірді. Диқандардың күрделі мәселесінің бірі, сумен қамтамасыз етуде, кәсіптерін ашуда аз көлемде несиемен қамтамасыз ету, қолдау көрсету қолға алынып жатқанын, алдағы атқарылар жұмыстар жайлы нақты мысалдармен түсіндірді.
«Қарызсыз қоғам» жобасын «AMANAT» партиясымен бірлесіп, қарызға батқандарды борышынан арылтуға, несие төлеу уақытын ұзартуға, қаржылық сауатын арттыру жолында атқарылған жақсылықтарды атап өтті. Банкроттық заң қабылданғанын, оның орындалу тәртібін түсіндірді. Сондай-ақ «Ұлтық қор – балаларға» жобасы қолға алынғанын, мұғалім мәртебесіне де баса мән берілгенін, сонымен қатар әкімдер сайлау арқылы сайланатынын, жергілікті бюджетті жергілікті әкімдерге басқару құқығы берілгенін әңімесіне арқау етті.
Шелек ауылдық округінің әкімі Сәкен Абдихалиев ауылда атқарылып жатқан игілікті жұмыстар жайлы айтып берді. Қойылған сұрақтарға жауаптар қайтарылды.
Анарбек БЕРДІБАЕВ.
Жаны жақсы ағаның
Етегін баспа, жолын қу.
Болайын деген баланың
Бетін қақпа, белін бу.
Иә, «болар бала болмысынан» екенін дана қазақ тауып айтса керек. Сондықтан болар, талабы таудай жеткіншекке қолдау білдіріп, талабын шыңдауға барын салған. Мақаламыз спортты жанына серік етіп, айдай әлемді аузына қаратқан әлемдік бәсекеде көк Туымызды көкке көтерген
Алихан Тоғызбай жайлы.
Ауданымыздың жас спортшысы Алихан Ермекұлы 26-27 тамыз аралығында Үнді елінің Коимбатур қаласында өткен спорттың Мейбукан Годзю-рю каратэ-до түрінен өткен Азия чемпионатында жеңіске жетіп, «Азия чемпионы» атанды.
Жалындаған жігерімен, бапкерлері-нен түйген шеберлігімен құрлық жарысында, спорттың жекпе-жек, «ката» түрлерінен қарсыластарынан оқ бойы озық шыққан Алихан байрақты бәсекеде талайдың таңдайын қақтырған. Азия елдерінің 2 мыңға жуық кіл мықтылары бақ сынаған бәсекеде Қазақ елінің абыройын асқақтатып, алтын медальмен екі алтын кубокті еншілеп, жас жеткін-шегіміз «Азия чемпионы» атағымен елге оралды.
12 жасар Алихан бала күнінен спортқа құмартып, осы саладағы аға-әпкелеріне еліктеп өскен. Небәрі 4 жасынан жанына жақын каратэмен айналысып, Еңбекшіқазақ ауданы Есік қаласындағы спорт мектебінің бапкері Фархат Мурсалиевтің тәрбиесінде болған.
Алихан күннен-күнге, жылдан-жылға ынталанып, бапкерінен тәлім алып, 2021-жылға дейін талай жетістіктерге жеткен. 2022-23 жылдар аралығында Алматы қаласында бапкер Нұрлан Керімбаевпен жаттығып, спорттық ше-берлігін шыңдаған.
Нұрлан Керімбаев – әлемдік деңгей-дегі еңбек сіңірген бапкер, әлемдік сыныпты төреші, қара белбеу иегері, спорт шебері, Республикадағы Мейбукан Годзю-рю каратэ-до спорт түрінің Президенті.
Бала күнінен баптаған ұстазы Фархат Мурсалиев та осы спорт түрінен талай белестерді бағындырған жан, қара белбеу иегері, Алматы облысы бойынша осы спорт түрінің жетекшісі, спорт шебері.
«Ұстаз талантты болса, шәкірті талапты болады» деген сөз осыдан шықса керек. Міне, осындай шебер бапкерлерден шыңдалып, талаптануының арқасында Алихан 50-ден аса алтын-күміс жүлделерге ие болып, алты дүркін еларалық чемпиондық атақтарға ие болған, қызыл белбеу, спорт шеберінің үміткері.
Алихан Тоғызбай 2011 жылы 26 мамырда Алматы облысы, Ұйғыр ауданы, Ақтам ауылында дүниеге келген. Әкесі Ермек Тоғызбайұлы, анасы Динара Ер-жанқызының, ата-әжесі Тоғызбай Нұр-сейітұлы мен Хабиба Текенқызының берген тағылымды тәрбиесі арқасында биік белестерді бағындырып, жас чемпиондардың қатарын толықтырды.
– Алихан балам үлкендердің ақ тілек, баталарымен, ата-анасының күш-жігер беріп, ынталандырып, дайындықтан қалдырмай қадағалауының арқасында биік-биік шыңға шығып, асуларды бағындырып отыр. Баламызды үлкен жеңісімен құттықтай отырып, осы бағы-тынан талмай, әлем чемпионы атануына тілектеспіз және осы мақсатқа жетуге барымызды саламыз. Сонымен қатар, баламыздың чемпион атануы үшін талмай тер төгіп, жігерін жанып, талабын шыңдаған бапкерлері Нұрлан Керімбаев пен Фархат Мурсалиевке айтар алғысымыз шексіз. Сондай-ақ, 5 сыныпқа дейін білім алған Есік қаласындағы Абылай хан атындағы орта мектеп пен Алматы қаласындағы №92 Махатма Ганди атындағы мектеп-лицейінің ұстаздарына ұлымызды білім нәрімен сусындатып, болашаққа сенімді қарауға баулығандары үшін ризамыз – дейді атасы Тоғызбай Нұрсейітұлы.
С.НҰРАДИН.