Елдің ырысы – табиғаттың байлығы.  Сол байлықты қызғыштай қорып, қамқорлығына алып, ерінбей еңбектеніп жүрген жандар – орман шаруашылығының қызметкерлері. Ал, орман шаруашылығы экономиканың бір саласы болып саналады. Орманшылар орманды зерттеу, есепке алу, ағаштар мен бұталардың тұқымынан және көшеттерінен түрлі ағаштар өсіріп, орманға айналдыру, оны жаңартып, күту, сүрек дайындау, оны кесіп, реттеу, арнайы тұқымбағында көшет өсіру, суландыру, орманды өрттен, зиянкестерден, түрлі аурулардан қорғау, саңырауқұлақ, ағаш шырынын жинау, ағашқа және орман өнімдерінен халық шаруашылығына қажеттерін қанағаттандыру үшін орманды қамқорлығына алып,  ісін реттеу жұмыстарымен шұғылданады.

Табиғат байлығын көздің қарашығындай қорғап, орман шаруашылығын өркендетуді басты міндеті деп санайтын «Шелек орман шаруашылығы» мекемесінің директоры, аудандық мәслихаттың VІІ шақырылым депутаты болған Бекболат Алтаевпен әңгімелескенімізде: «Шелек өңірі шыбық қадасаңыз, шынар бой көтеретін, топырағы құнарлы, бұта түбі бір асым ет болған, ырыс-береке қонған, бабадан қалған бақ мекен ғой. Ауылдың жаз жайлауында таудың қоңыр аюы  мен кекілікті де көруге болады. Қырда елік пен қоян, қасқыр мен түлкі кездеседі. Даласында дуадақ, қаз, үйрек, бірқазан, орман-тоғайларында қырғауыл мекендейді. Өлкеміз сазды әрі құмды болғандықтан көкпек, жусан, изен, бидайық, қызыл мия, еркек шөп, теріскен, жантақ, адыраспан, жиде секілді көптеген өсімдіктер өседі. Қазақстанның «Қызыл кітабына» енген тораңғы мен сексеуіл де – даламыздың көркі» – деп бастады сөзін табиғаттың  сыйлаған  берекесін  бірінші тілге тиек етіп.

Шелек орман шаруашылығы 1948 жылы құрылып, алғашқы директоры болып О.Саурықов, одан кейінгі жылдары И.Орел, В.Цвелодуб, Н.Абиев, Қ.Жабықбаев, А.Көбенов, Ө.Маникеев, С.Құйқабаев, А.Жабықбаев, Т.Қадырбаев, қазіргі кезде Б.Алтаев басқарып,  бүгінгі күнге дейін өз міндеттерін абыроймен атқарып келеді. Алтай Мұқаметжанұлы бұл салада қызмет етіп келе жатқанына 35 жыл болыпты. Шелек орман шаруашылығында орманшы, инженер, бас орманшы болып 5 жыл, Сарқан ауданындағы орман шаруашылығында мекеме директоры болып  7 жыл және «Іле Алатауы» МҰТП-да директордың орынбасары болып істеп, мол тәжірибе жинаған ол 2015 жылы Шелек орман шаруашылығын басқаруға қайта оралды. Ал 30 жылдай осы шаруашылықта қызмет етіп жүрген  Мұхит Палванов орынбасары, Мұхиттың орнына А.Мұқанов  бас инженер болып  іске бел буып кіріскен. Шелек, Іле, Табанқарағай, Жиделі орманшылығына  Е.Сарман, А.Садықбаев, Ғ.Давленов және М.Темірбаев орманшы болып, қарамағындағы қызметкерлерімен орман байлығын, табиғатын аялап, қорғап келеді.

Мекеменің жалпы жер көлемі 117 461 гектар, оның ішінде 48 810 гектары орманды алқап. Таулы аумақтарда орман ағаштарынан Тянь-Шань шыршасы, қайың, терек, тал, тоғайлыжазық аумақтарда орман ағаштарынан тораңғы, жиде, тал, сексеуіл өседі. Табиғи өсе беруге қабілетті бірден-бір жапырағы мол ағаш, ол – тораңғы. Ауа райының күрт жылуы мен суығына, желдің күші мен ылғалдылықтың тапшылығына қарамастан, шөл мен тұзға төзімді бағалы ағаш. Тамыр жүйесі жақсы жетілгендіктен 10 метр тереңдіктегі жер асты су көздерінен нәр алып, тіршілік етеді. Тораңғы ағашы орман шаруашылығында қоршаған ортаны қорғау, құрылыс индустриясы, өндірістік әртүрлі салаларда қолданылады. Ал, сексеуіл – діңі қатты, бұтақтары бұралыңқы болып келетін, құмды жерлерде өсетін, шөлге төзімді, морт сынатын қатты ағаш.  Іле орманшылығының 3730 гектар жерінде ақ және қара сексеуіл өседі. Оған өздігінен өсіп, көбеюге жұмыс жүргізіледі. Сексеуілді рұқсаттыз кесуге үкімет тарапынан қатаң тыйым салынған. Орманшылар үгіт-насихат жүргізіп, бір бойынан бірнеше қасиет табылатын «шөл даласының падишасын» сақтап қалуға бүкіл қоғам болып атсалысуға шақырады.

Мекемедегі төрт орманшылық 48 айналымға бөлінген. Шелек орманшылығының жалпы аумағы 32 526 гектар, орманды алқабы 12 573 гектар, ормансыз алқабы 19 952 гектар, орманшылықта барлығы 16 айналым бар. Бүгінгі күнде орманшылықта 1 орманшы, 3 орман шебері, 16 орман күтушісі қызмет атқарады. Шелек орманшылығының аумағында орман қоры жерінен ұзақ және қысқа мерзімге келісім-шарт арқылы 67 орман пайдаланушылар бар. «Біздің алдымызда тұрған басты мақсат – еліміздің табиғат байлығын арттыру. Бізге сеніп жүктелген жұмысты жауапкершілікпен атқарып, көптің көңілінен шығып, адал қызмет ету» – дейді Шелек орманшылығының  қызметкерлері, алдағы күндерге зор үміт артып.

Мемлекеттік орман қоры учаскелерінде орман пайдаланушылар сүрек, шайыр, ағаш шырынын, қосалқы сүрек ресурстарын дайындау, шөп шабу, мал жаю, марал шаруашылығы, аң шаруашылығы, ара ұялары мен омарта орналастыру, бау шаруашылығы, бақша шаруашылығы, бақ шаруашылығы және өзге де ауыл шаруашылығы дақылдарын өсіру, дәрілік шөптер мен техникалық шикізаттар, жабайы өсетін жемістер, жаңғақтар, саңырауқұлақтар, жидектер мен басқа да тағамдық өнімдер, мүк, орман жамылғысы мен түскен жапырақтар, қамыс дайындау мен жинау  түрлері қолға алынған.

Шелек орманшылығындағы уақытша тұқымбақ Шелек орман шаруашылы-ғының №18 айналымында №3 орманның №20, 49 жер телімдерінде орналасқан.  Жалпы көлемі 5 гектар. Бұл тұқымдықта қылқан жапырақты қырым қарағайы, жай қарағай, биота ағаштары, жалпақ жапырақты өрік, долана, каштан, емен, қарағаш ағаштары өсірілуде. Сонымен қатар бұл жерде сәндік бұталы гүлдердің ақ сперия, сары сперия, дерн, қызыл барбарис, пузыреплодник, гибискус тәрізді 10 түрі бар. Оларды калемшелеу әдісі арқылы көбейту қолға алынған. Тұқымбақтың сеппе бөлімінде тұқымнан себілген 3 жылдық көшеттер 0,35 гектар жерге өсірілуде. Қалғанын екпе бөлімі құрайды. Орманды молықтыру және орман өсіру жөніндегі бас инженер Нүрлен Етекбаев: «Президентіміз Қасым-Жомарт Тоқаевтың Жолдауында айтылған  2021-2025 жылдар аралығында 2 миллиард ағаш көшеттерін отырғызу туралы тапсырмасын жүзеге асыруды мекеме ұжымы да қызу қолдады. Осы жылдың көктемінде жоспар бойынша 9,3 гектар жерге 41 100 дана қарағаш, 8,9 гектар жерге 29 860 дана жиде, 10,7 гектар жерге 36 мың дана өрік, барлығы 28,9 гектар жерге 106 960 дана ағаш, сонымен бірге мекеменің екпе ағаштарын толтыру үшін 7 мың өрік, жиде, қарағаш көшеттері отырғызылды. Тұқымбақ алқабына 4 700 дана кәдімгі қарағай, 1 500 дана қырым қарағайы, 2 500 дана шығыс биота ағаштары бапталуда. Басқа мемлекеттік мекемелерге, мектептерге, балабақшаларға мекеменің уақытша тұқымбағынан 77 700 дана әртүрлі ағаш көшеттері берілді. Тұқымбақтағы 0,53 гектар жер теліміне әртүрлі ағаш тұқымдары себіліп, күтіп-бапталуда» – деп атқарылған жұмыстармен таныстырды.

«Байлықтың атасы – еңбек, анасы – жер» дейді дана халқымыз. Жер қойнауында жатқан байлық – халықтың байлығы. Ата-бабаларымыз осы жерді қан төгіп, қорғап қалды емес пе?  Сондықтан оны халық мүддесі үшін пайдаланып, көздің қарашығындай қорғауды басты міндеті санайтын Іле орманшылығының жалпы орман қоры аумағы 50 257 гектар, оның ішінде орманды алқабы 23 345 гектар. Орманшылықта барлығы 16 айналым бар. Бүгінгі күнде орманшылықта орманшыдан басқа екі орман  шебері,  16 орман күзетшісі қызмет етеді. Іле орманшылығында ұзақ келісім-шарт арқылы 10 орман пайдаланушы 1 602 гектар жерді мәдени-сауықтыру, рекрациялық және спорттық мақсаттапайдаланса, «Манул» аңшылық және балық ұйым бірлестігі  жалпы аумағы 127 270 гектар жердің, оның ішіңде 1 602 гектар жерде өрт қаупі маусымында өз іс-жоспарлары бойынша жұмыстар атқарады. 2014-2021жылдары бұл орманшылықта 106 гектар жерге екпе ағаштары отырғызылды. Бүгінгі  таңда бұл жұмыс жалғасын табуда.

Туған жерін көркейтуде Табан-қарағай орманшылығында да жемісті жұмыстар атқарылып келеді.  Мұндағы жалпы орман қоры аумағы 21 733 гектар, оның ішінде 6 972 гектары  орман алқабы. Орманшылықта екі орман шеберлік учаскесі, 7 орман күтуші айналымы бар. Мұнда бір орманшы, екі орман шебері, жеті орман күтушісі жұмыс істейді. Мұнда да ұзақ және қысқа мерзімді 11 орман пайдаланушы бар. 2016 жылы орман орналастыру жұмыстары жүргізіліп, 2020 жылдан бастап ерікті іріктеліп, ағаш кесу әдісі бойынша жұмыстар жасалуда. Жылда өртке қарсы минералды жолақтарды жаңарту жүргізіледі.

Төртінші орманшылық Жиделінің жалпы орман қоры аумағы 12 946 гектар, оның ішінде 5 920 гектары  орманды алқабы, 9 айналымы бар. Мұнда да бір орманшы, екі орман шебері, тоғыз орман күтуші, ұзақ және қысқа келісім-шарт бойынша 13 орман пайдаланушы жұмыс істейді. Орманшылықтың аумағында «Ақтоған» аңшылық шаруашылығы орналасқан және 0,5 гектар уақытша тұқым бағы бар. Жыл сайын екпе ағаштарын отырғызу, күтіп-баптау, өртке қарсы жұмыстар атқарылады. Барлық орманшылықта материалдық-техникалық базасы бар және арнайы құрылымдармен жаб-дықталған.

Шелек орман шаруашылық мекемесінде Шелек орман өрт сөндіру станциясы өрт сөндіргіш техникаларымен, алты адам түрлі құрал-саймандармен  қамтамасыз етілген.

– Орман өртін сөндіру оңай шаруа емес. Сондықтан оған жол бермеудің алғы шарттарын қатаң сақтау қажет. Қалың ағаш ішіндегі өрт тез арада өршіп, оңың ішіне техникамен ену де қиын шаруа. Сондықтан өрттің алдын алу керек. Биыл Абай облысындағы орманда алапат өрт шыққаны белгілі.  Бізде де ондай жағдайлар болып тұрады. Міне осындай қауіптің алу мақсатында биылғы жылы қосымша штаттар берілді. Нақты айтсақ, 1 заңгер, 1 мемлекеттік сатып алу маманы, 1 орманды молықтыру және орман өсіру жөніндегі бас инженер, 1 инженер лесопотолог, 4 орманшылар көмекшісі, 2  трактор жүргізуші, 4 өрт сөндіруші қосылды – деп түсіндірді директордың орынбасары  Мұхит Палванов.

Биыл жақсы жұмысымен Шелек орман өрт сөндіру станциясының басшысы Е.Артықбаев, өрт сөндіруші К.Дурсунов ерекше көзге түсіпті. Сондай-ақ, орман күтушілерден К.Иб-рагимов, Я,Давленов, Б.Станов, Жиделі орманшылығының күтушілері А.Щербанев, А.Таңқыбаев, жас орман шебері Алтынбек Әлібек, өрт сөнді-руші Е.Абдыкаримов, Іле орманшы-лығының орман күтушілері Б.Сұлтан-беков, А.Полысов, орман шебері Д.Мешимбаевтар іскерліктерімен еленген.

Мекеме қызметкерлері заң бұзушы-лықтарды бодырмау мақсатында үгіт-насихат жұмыстарын жүргізіп әрі өз міндеттерін зор жауапкершілікпен атқарып, қажырлы еңбек етіп, халыққа мінсіз де адал қызмет етіп келеді. Біз де оларға табыс тілеп, төл мерекелерімен құттықтадық.

Анарбек БЕРДІБАЕВ.

Мәдениет – ұлттың мәйегі, елдің асыл мұрасы, баға жетпес қазынасы. Күндіз күміс, түнде алтын аққан қасиетті топырағымызда ел мәдениетін, әдебиетін, салт-дәстүрін насихаттауда сүбелі жұмыстар атқарылып келеді. Жақында «Ауылым – алтын бесігім» атты аудан, қала мәдениет күндерінің іріктеу кезеңі ауданымызда «Алтын адамның атамекені» айдарын тағып, жоғары дәрежеде өтті.

Тұманбай Модағалиев атындағы аудандық мәдениет үйінде болған төл өнеріміздің ортақ мерекесіне ақ жаулықты әжелер, ақ сақалды аталар, жас балаларға дейін атсалысты. Шараға арнайы келген Алматы  облысы мәдениет, архивтер және құжаттама басқармасының басшысы  Данияр  Алиев бастаған қонақтар аудан жұртшылығы ұйымдастырған көрме мен қазақ үйлерді аралаудан бастады. Ауданымызға арнайы ат басын бұрған қонақтар қазақ қолөнерінің дара тұлғасы Д.Шоқпарұлы атындағы қолөнер музей шеберлерінің  көрмесіне  көз салды. Музей директоры Дәулет Дәркембайұлы хас шебердің көзіндей болған жәдігерлер мен өнер ордасында қызмет ететін қолөнер шеберлерінің жасаған бұйымдарын келген қонақтарға таныстырды.Дәркембай Шоқпарұлы атындағы мұражайда 2400-ден аса жәдігер бар. Басым бөлігі ұстаның қолынан шыққан ерекше туындылар. Оған қоса онда шебердің өзі қолданған ескі құрал-жабдықтары да бар. Дара тұлға Дәркембай Шоқпарұлының соңынан өшпейтұғын із қалды. Онда сирек кездесетін тері ыдыстарды да кездестіруге болады. Сондай тері ыдыстардың бірін Дәулет Дәркембайұлы қауға деп таныстырды.  Қауға – көбінде бие және сиыр саууға арналған ыдыс. Қауға өте жұмсақ болғандықтан сауған кезде малға жайлы сезім тудырады. Қауғамен сүт сауғанда мал екеш мал да алпыс екі тамырын иіп, сүт беретін көрінеді.

Одан соң Данияр Абзалиденұлы мен аудан әкім Алтай Досумбаев бастаған топ мәңгілік махаббат жыршысы атанған қазақ поэзиясының аса көрнекті ақыны Тұманбай Молдағалиевтің жырын тыңдап, рухына тағзым етті. Аталған мәдениет күндері аясында аударыспақ, асық ойнау, қазақ күресі, тоғыз-құмалақ, садақ ату сынды ұлттық спорт түрлері жиналған көптің назарына ұсынылды. Жұрт әсіресе, көздегенін мүлт жібермейтін садақшылардың  өнеріне қайран қалды. Олардың арасында халықаралық  жарыстардағы үздік же-тістіктерге жеткен Мадияр Шәріпбай сынды жүлде-герлеріміз де бар. Ол Венгрияның Помаз қаласында өткен халықаралық жамбы ату жарысының алтын жүлдесін жеңіп алған болатын. Ауданымыздың спортында толағай табыс-тар аз емес. Жыл сайын халықаралық және республикалық додаларда топ жаратын жүлдегерлердің  қатары көбейіп келеді. Оған өңірде өтетін жарыстардың қосар үлесі зор. Айталық, ауданымызда жыл сайын ҚР спорт ардагері Аманбек Саматов атындағы грек-рим күресінен  жасөспірімдер  арасындағы  дәстүрлі  ашық республикалық турнир  өтіп келеді. Аталған турнирге еліміздің әр өңірінен  жүз-деген  балуан қатысып, 15 салмақ дәрежесінде боз кілемде бақтарын сынайды. Сонымен қоса,  ха-лықаралық дәрежедегі төрешілер мен  ҚР Еңбек сіңірген жаттықтырушылары қонақ ретінде қатысады. Киелі топырақтың өткенінен сыр шертетін, «Алтын адам» туралы  аңызға арқау болған  шағын сахналық қойылым көрсетілді. Көрмеде қазақ халқы пен аудан аумағында ірге тепкен өзге этностардың ұлттық киімдері, тағамдары, жергілікті өнімдер, қолөнер шеберлерінің жасаған бұйымдарын арнайы келген қонақтарға таныстырды. Бүгінде ауданымыздағы этносаралық татулық пен тұрақтылыққа өз үлесін қосып жүрген 5 этно мәдени бірлестік (ұйғыр, славян, грек, шешен-ингуш, түрік) пен 3 клуб (күрд, кәріс, татар) қызмет атқаруда.  Мәдени шара аясында ақ жаулықты әжелер мен ақ сақалды аталарымыз бабадан мирас болып келе жатқан дәстүрлерді дәріптеп, халқымыздың  тағам мәдениетін паш етті. Сонымен қоса сәулетші, этнодизайнер Құрманғазы Қадыровтың қолөнер туындылары да көп көңіліне жол тартты. Әсіресе этно-дизайнердің  «Алматы – арман қала» атты туындысы философиялық ойға толы. Онда жауырын мен алма негізгі образға айналған. Құрманғазы Қадыров бұл еңбегіне жауырынды бекер таңдамаған. Алматы сияқты ару қалаға жан-жақтан жастар ағылады. Солардың жолын ашатын қала болсын деген ниетпен әдейі осы сүйекті таңдап алған екен. Бұл да көрген жанды қызықтырмай қоймайды. Сондай-ақ, «Ай жарық», «Жаңғырық», «Қа-лыңдық», «Босағаң берік болсын!» деген туындылары да өнерсүйер қауымды терең ойға жетелейді. Ал Қаракемер мәдениет үйінің жанындағы Тоқтасын Әбілезұлы жыршы-термешілер мектебінің өнерпаздары Жетісу жыр-шыларының дастандарынан үзінді толғап, Жамбыл мен Сара қыздың айтысынан шағын қойылым көрсетті. Бүгінде Қаракемер мәдениет үйін нағыз өнер ордасы деуге болады. Ұжымның мықтылығының арқасында көптеген жетіс-тіктерге қол жеткізгені елге аян. Осы күнге дейін 15 үйірме жұмыс істеген болса, оған жыр-терме мектебі де ұлы өнердің қайта жаңғыруына қалтқысыз қызмет етіп келеді.

Мереке барысында сөз алған облыстық  мәдениет, архивтер және құжаттама басқармасы басшысының басшысы  Данияр  Алиев:

– Мәдениет – ұлттың қуаты, ғасырлар бойы үзілмей келе жатқан рухани болмысы, ақыл-ой парасаты. «Өнер – ұлттың жаны», – дейді дана халқымыз.Өркениетті ұлт, ең алдымен, тарихымен, өнерімен, әлемдік мәдениеттің алтын қорына қосқан үлесімен танылып, бағаланады. Тарихы терең мекеннен таланттар шоғыры көптеп түлей берсін! Тәу етер Тәуелсіздігіміздің туы мәңгі желбірей берсін! – деді. 

Мерекелік шара аудан өнерпаздары қойған концерттік бағдарламаға ұласты. Салтанатты шарада қос ішектен күй төгіп, қоңыр дауыспен ән шырқап, үкілі тақия мен бүрмелі көйлегін киген өнерпаздар киелі сахна төрінің шырайын кіргізді. Күмбірлеген күйден, жергілікті ақындардың жыр-өлеңдерінен шашу шашқан жандар мен өзге этнос қауымының  өнері  жиналған жұртшылықтың ыстық ықыласына бөленді. Тұрғындар әсем ән мен күйлерінен рухани әсер алып тарқасты.

Е.АСЫЛ.

Ұстаз болу – жүректің батырлығы,

Ұстаз болу – сезімнің ақындығы,

Ұстаз болу – мінездің күн шуағы,

Азбайтұғын адамның алтындығы.

Иә, ғалым да, кенші де бас иген ұлағат иелерінің ұлт мүддесі жолында атқарып жүрген еңбегі ұшан-теңіз. Ұлт ұстазы Ахмет Байтұрсынұлы айтқандай, қандай да бір жетістікке жету үшін білім керек. Ал сол білімнің қайнар көзі – ұстаздар қауымы. Ақырын жүріп, анық басып, бойындағы барлық ізгілікті сабырлы мінезімен, салиқалы, салмақты ақылымен шәкірттің санасына сіңіре білген мұғалімдердің төл мерекесі Т.Молдағалиев атындағы аудандық мәдениет үйінде аталып өтті.

Шараға аудан әкімі Алтай Досумбаев, мәслихат төрағасы Бекет Ахметов қатысып, ұлағат иелерінің қуанышымен бөлісті, ізгі тілектерін арнады.

– Ұстаз – мектептің жүрегі. Баланың бойына білім нәрін себетін, адамгершілік дәнін егетін басты тұлға. Сондықтан, Мағжан Жұмабаев айтқандай: «Алты алаштың басы қосылса, төр – мұғалімдікі» болуы тиіс.  Құрметті ұстаздар, білім саласының ардагерлері мен қызметкерлері! Сіздерді кәсіби мерекелеріңіз – мұғалімдер күнімен шын жүректен құттықтаймын! Биыл педагогтердің кәсіби мейрамы ресми түрде  бекітіліп,  халықаралық мұғалімдер күні 5 қазанға белгіленді. «Бала жанының бағбаны» атанған ұстаздарымызға деген құрметіміз ерекше. Бүгінгі мереке күні сіздерге зор денсаулық, бақыт, сарқылмас күш-қуат, білім шыңына шығармашылықпен өрлей берулеріңізге тілектеспін! Білімді және саналы шәкірттеріңіз көп болсын! Жоғары кәсіпқойлықты, зор рухани күшті, даналықты, шыдамдылықты және адалдықты талап ететін игілікті еңбектеріңіз қоғамда лайықты құрметке ие. Келешек ұрпаққа сапалы білім, саналы тәрбие беру, елі мен жерін сүйетін, ұлтқа қызмет ететін адал азамат ретінде қалыптастыру – баршамызға жүктелген үлкен міндет. Осы қасиетті де қастерлі міндетті орындауда жетекші рөл атқарып, ауданымыздың білім беру саласын дамытуға және өскелең ұрпақты тәрбиелеуге баға жетпес үлес қосқан ұстаздарға, ардагерлерге ерекше алғыс айтамын! – деп, ақжарма тілегін жеткізген аудан басшысы Алтай Машикұлы білім саласындағы жағымды жаңалықтарға тоқталды. 

Биылғы жылдың жағымды жаңалықтардың бірі – оқу-ағарту министрлігінің білім саласында 30 жылдан астам еңбек еткен ұстаздарды «Еңбек ардагері» медалімен марапаттау жөніндегі шеші-мі. Бала денсаулығын, оның дене және ақыл-ой дамуын анықтайтын бағыттардың бірі өскелең ұрпақты сапалы тамақтандыруды ұйымдастыру болып табылады, осы орайда Мемлекет басшысының тапсырмасымен  биыл қыркүйектің 1-нен бастап аз қамтылған отбасылардан шыққан 10 мыңға жуық оқушы, сондай-ақ әлеуметтік мәртебесіне қарамастан 17 мыңнан астам бастауыш сынып оқушылары үшін тегін тамақтандыру ұйымдастырылды. Дұрыс ұйымдастырылған тамақтандыру оқушылардың денсаулығын сақтауға көмектесетіні сөзсіз. Сонымен қатар, 1 қыркүйектен бастап балабақша педагогтарының жалақысы 30 пайызға көтерілді. Бұл да педагогтің  өмір сүру жағдайларын жақсарту және оның әлеуметтік мәртебесін, сондай-ақ мектепке дейінгі тәрбие мен оқыту мұғалімінің беделін арттыру мақсатында мемлекет тарапынан атқарылып жатқан игі істерінің бірегейі деп айтуға болады.

Білім беру саласын дамытуға да ерекше көңіл бөлінуде. Биылғы оқу жылы  Есік қаласында 1500 орындық  орта мектеп-лицейі ашылса, инвесторларды тарту арқылы 900 орындық 3 мектептің құрылысы басталды. Сондай-ақ,  «Жайлы мектеп» бағдарламасы бойынша 4 мектептің, 2024 жылы 7  мектептің құрылысы басталып, 2025 оқу жылында қолданысқа берілмек.Ауданда мектебі жоқ елді мекендерден 5 643 оқушы тегін тасымалданады.  Шалғай ауылдардағы демографиялық, миграциялық дамуға байланысты, тасымалданатын оқушылар саны да жылдан-жылға өсуде. Осы мәселені шешу мақсатында облыс әкімі ауданымызға 36 орындық заманауи 5 автобус  сыйға тартты.

Мерекелік шара барысында Алтай Досумбаев жеткіншек ұрпақты оқыту мен тәрбиелеудегі еңбегі үшін бірқатар мектеп пен балабақша ұстаздарын аудан әкімінің Алғыс хатымен, Құрмет грамотасымен марапаттады. Сонымен қатар оқу-тәрбие жүйесінде жоғары деңгейде өзінің іс-тәжірибесі мен шығармашылық еңбегін көрсеткен Рахат №1 орта мектебі «Үздік мектеп-2023», «Келешек» бөбекжай-балабақшасы «Үздік балабақша-2023» номинацияларымен марапатталды.

«Жылдың үздік мұғалімі-2023» аудандық байқауының жеңімпазы – Ы.Алтынсарин атындағы орта мектебі география пәнінің мұғалімі Данияр Туғанбаевқа, облыстық «Үздік сынып жетекшісі-2023» байқауының жеңімпазы – Балтабай орта мектебі математика пәнінің мұғалімі Виктор Барматовқа марапаттар тапсырылды.

Шара барысында бірқатар ұстаздар қауымы облыс әкімінің, облыстық білім басқармасының Құрмет грамотасымен, еңбек ұжымдары Оқу-ағарту министрінің Алғыс хатымен марапатталды.

«Алматы кітап» баспасының ұйымдастыруымен жас мамандар арасында өткен республикалық байқауда І орын алған Төле би атындағы орта мектебі информатика пәнінің мұғалімі Бақытжан Ибрашевқа Құрмет грамотасы және ақшалай сыйақы табысталды.

Түрлі марапаттарға ие болып, мерекеде мерейі тасыған ұлағат иелерінің құрметіне эстрада жұлдызы Бақыт Шадаева мен аудандық мәдениет үйінің өнерпаздары әуелете ән салып, көтеріңкі көңіл күй сыйлады.

С.НҰРАДИН.