Тіл тағдыры – ұрпақ тағдыры. Ұрпақ тағдыры – ел тағдыры. Бұл – бұлжымас қағидат. Дегенмен әлі ақсау тұстарымыз сүйекке дақ боп тұрғаны. «Айтпаса сөздің атасы өледі», бей-берекет заманда, ел-жұрт дін аманда, исі қазақ баласы ана тілде сөйлеуде тұтылды. Сөйтіп, қашырды, халқым, құтыңды. ХХ ғасыр әкімшіл-әміршіл жүйе болса бір сәрі еді. Бүгінде егемен елміз. Әлем алпауыттарымен теңбіз. Жаутаңдайтын несі бар, жалтаңдайтын да несі бар?.. Біз кімнен кембіз? Тәуелсіздік тұсында қазақ пен қазақ орысша шүйіркелесетіндей не күн туды басымызға. Жарымжан жарнамаларымыздың жағдайы әне, «Әуезовті» («ул. М.Ауезова» дегенді «М.Әуезова көшесі» деп аударған)  «Әуезова» дедік. Мұны сынап сан мәрте қамшыладық, алайда шыбық басы да қимылдамады. «Брендтің әйелдің аяқ киімі», «Валюта аиырбастау» деген жарнамаларды да сын тезінен өткізіп жазғанымыз бар. Одан бері де 3 айдың жүзі болды. Жарымжан жарнамалар қаз-қалпында сақтаулы. «Қара басын» жардан жарға соққан Ана тілдің тағдыры Тәуелсіздіктен кейін де оңалмай тұрғанын-ай...

«Тәуелсіздікті баянды ету – оған қол жеткізуден де қиын. Мемлекеттігіміздің тұғырын мызғымастай нығайта түсу үшін бізге әлі талай күрделі, өткелі көп бұралаң жолдардан өтуге тура келеді». Бұл – Елбасымыз Нұрсұлтан Назарбаевтың 30 қарашада жариялаған «Қазақстан жаңа жаһандық нақты ахуалда: өсім, реформалар, даму» атты Жолдауында айтылған ақиқат. Рас, бастан не өткермедік. Құладық, сүріндік. Жыладық, қайта тұрып жүгірдік. Кейде тағдыр тауқыметінен де түңілдік. Бәрі де өтті. Енді дамуға бет алдық. Мұның айғағы – жақында жарияланған Жолдау. берілген нақты тапсырмаларды талқылау, талдау, орындалу барысын ойластыру мақсатында аудан әкімдігінің мәжіліс залында кеңейтілген жиын өтті. Оған аудан әкімі Бинәлі Ысқақ  қатысты.

Облыстық, аудандық мәслихат депутаттары, аудан әкімінің орынбасарлары, бөлім, мекеме басшылары және округ әкімдері қатысқан саяси жиынның салмағы болды. Себебі, мешін жылы Елбасымыздың өзі айтқандай, соқтықпалы, соқпақты жыл болмақ. Жиында аумалы-төкпелі сәтте аудан аумағында атқарылатын жұмыстар таразыланды. Аудан басшысы Жолдауды түсіндіру мақсатында баяндама оқып, алдағы жылға нақты тапсырмалар да берді. Айтып өтейік, мінберге көтерілген кәсіпкер Қ.Сұлтанғазиев, Д.Қонаев атындағы орта мектеп директорының орынбасары Ж.Тетрова және Рахат орта мектебінің директоры Б.Рақымжан жаһандық нақты ахуалда Қазақстанның таңдаған бағытын оң санап, Бинәлі Әбдіқапасұлының сөзін бірауыздан құптады. Кеңейтілген отырысты аудандық мәслихат хатшысы Әділбай Талқамбаев жүргізіп отырды. Назарларыңызға аудан әкімі Бинәлі Ысқақтың мешін жылында аудан атқамінерлеріне жүктеген міндеттерін жариялап отырмыз.