Құрметті Еңбекшіқазақ ауданының тұрғындары!
Баршаңызды 1 наурыз – Алғыс айту күнімен шын жүректен құттықтаймын!
Алғыс айту күні – бұл ең алдымен, елімізде тыныштық пен үндестік, өзара сенімділік пен барлық қазақстандықтарға деген құрметтің орнығуына негіз болған Президенттің бейбітшілік пен келісім саясатының салтанатты күні. Бұл тағдыр тәлкегімен Қазақстан жеріне еріксіз қоныс аударылған түрлі этнос өкілдерінің қонысына айналған қасиетті қазақ жері мен қонақжай қазақ халқына терең тағзымының белгісі. Қазақ халқы қиын-қыстау заманда олардың басына түскен ауыртпалықты қайыспай, бірге көтере білді. Бұл бүгінгі таңда еліміздегі түрлі ұлт өкілдерінің арасындағы адамгершілік қарым-қатынастың өнегелі өлшеміне айналды. Бұл күн – Қазақстанның тағдыр тоғыстырған көпэтносты халқының ортақ тарихын құрметтеу, қайырымдылық дәстүрлерін, әлеуметтік ынтымақтастықты және өзара көмек көрсетуді қолдау күні.
Алғыс айту күні – қазақстандық патриотизмнің, достығымыз бен бірлігіміздің, мәдени саналуандығымыздың жарасқан күні. Себебі, Елбасы Нұрсұлтан Әбішұлы Назарбаев 100-ден аса этностың әрқайсысы өзінің қайталанбас өрнегін салуының нәтижесінде біздің біртұтас ұлтымыз бірегей артықшылықтар иесіне айналғанын атап өткен болатын.
Біздің ауданымыздың өзінде, 300 мыңға жуық 54 ұлт пен ұлыс өкілдерінің өзара ауызбіршілікте күн кешіп жатқан, халқының ынтымағы жарасқан мекен. Өңірімізді мекен етіп отырған түрлі ұлт өкілдері аудан өмірінің әр саласында лайықты еңбек етіп, әлеуметтік-экономикалық дамуына өзіндік үлестерін қосуда. Бұл да еңбек қатынастары арқылы бір ортада біте қайнасқан тұрғындардың өзара сыйластығы артып, бір-біріне деген алғысының молаюына ықпал ететіні сөзсіз.
Қадірменді жерлестер!
Қазақстан халқын мәңгілікке біріктіруге бағытталған жалпыұлттық патриоттық идеяның жарқын көрінісі, қазақстандық бірегейліктің негізгі арқауы – еліміздегі барлық ұлт пен ұлысты бір шаңырақ астына топтастыратын Алғыс айту күні құтты болсын!
Еліміздің біртектілігі мен бірлігі нығая берсін!
Баршаңызға мықты денсаулық, отбасыларың-ызға қуаныш, бақыт тілеймін!
Ізгі тілекпен: Еңбекшіқазақ ауданының әкімі Қашқымбаев Қуанышбек Қалиұлы
