Кезекті 57-сессия күн тәртібінде бір ғана мәселе қаралды: 2020-2022 жылдарға арналған аудандық бюджет. Бюджет жобасымен аудандық экономика және бюджеттік жоспарлау бөлімінің басшысы Бағлан Мушаева таныстырды. Сессия жұмысына аудандық мәслихат депутаттарымен қатар аудан әкімі Бинәлі Ысқақ қатысып отырды.

Биылға жалпы сомасы 36 млрд 272 млн 958 мың теңге қарастырылған. Оның 25 млрд 16 млн 779 мың теңгесі білім саласына жұмсалмақ. Айрықша атап өтерлігі, ұстаздардың біліктілігіне сай еңбекақыларын өсіруге 2 млрд 129 млн 183 мың теңге, бұдан бөлек магистрлік дәрежесі бар ұстаздар жалақысын көтеруге 38 млн 113 мың теңге қарастырылып отыр. Сол секілді «Балапан» бағдарламасы шеңберінде ашылған балабақшаларды қолдауға да 2 млрд 921 млн 52 мың теңге бөлінді. В.Терешкова атындағы, Ж.Қайыпов атындағы орта мектеп жанынан жапсаржайлар салуға, Шелектегі Абай атындағы, Ащысайдағы Ш.Уәлиханов атындағы орта мектепттерді күрделі жөндеуге жобалық-сметалық құжаттарын әзірлеуге, И.Саттаров атындағы орта мектептің бос тұрған ғимаратын күрделі жөндеуден өткізіп, балабақша жасауға қаражаттар да қарастырылды. Сондай-ақ, «Ауыл – ел бесігі» бағдарламасы шеңберінде Х.Бижанов атындағы орта мектепті күрделі жөндеуге 501 млн 999 мың теңге қарастырылды.

Жайдары жаңалықтардың  ендігісі – Қызылшарықтағы электр энергия желілерін күрделі жөндеуге 292 млн 022 мың теңге, Ащысайдағы су құбырларын жөндеуге 30 млн 683 мың теңге, Есік қаласында 60 пәтерлі жалдамалы үй салуға 165 млн 276 мың теңге, аз қамтылған отбасыларға жалдамалы қосымша 60 пәтерлі үй салуға 122 млн 796 мың теңге, Шелектің кәріз жүйесін жөндеуге 216 млн 672 мың теңге бөлінді. Бұдан өзге де әртүрлі салаларда бірқатар жақсы жаңалықтар орын алмақ. Осынау бюджетті аудандық мәслихат депутаттары бірауыздан қолдады.

Әлбетте, бұл ауқымды жұмыстардың әліппесі ғана. Себебі, жыл ішінде бюджетті толықтырулар да болады. Ендеше, жаңа жыл жақсы жаңалықтарға толы болсын демекпіз.

Қайнар ЖҰМАҒОЖА