Көктөбе округіне қарасты Балабек Кәрібаев атындағы көше тұрғындары жыл басын сәрсенбінің сәтті күні қарсы алды. Ынтымақты ырыс деп түсінген тұрғындардың еңбектеген баласынан, еңкейген қариясына дейін ақшаңқай қазақ үйлерден орын алып, наурыз көжеден дәм татты.
– Наурыз – қазақтың жыл басы. Жер әлем бусанып, түліктің аузы көкке тиген осынау күн – Алланың ырысы, берекесі. Бұл сәтті әркім өз үйінде нау-рыз көже пісіріп, молшылықтың белгісіндей бәріне ұсынады. Кәрібаев көшесінің тұрғындары биыл алғаш рет көше болып, наурызды атап өтуді жөн санадық. Бастаманы бәрі қолдады. Қазір өзіңіз көріп отырғандай көше тұрғындарынан бөлек Көктөбедегі әр көшенің үлкендерін де арнайы шақырттық. Ондағы мақсат біреу ғана – бірлігімізді нығайту, – дейді ұйымдастырушылар.
Ұлы Отан соғысына аттанып, хабарсыз кеткен ардагер Балабек Кәрібаев атындағы бұл көшеге жарқыраған асфальт та төселген. Батырдың келіні бүгінде сексеннің сеңгіріне шыққан Қайша Кәрібаева да төрді толтырып, ақ батасын берді:
– Дәулетті бас берсін,
Бақытты ас берсін.
Ұлыстың ұлы күнінде,
Ұлың оңға қонсын,
Қызың қырға қонсын.
Малың өріске толсын.
Дәулетіңді асырсын,
Дұшпаның басылсын.
Аузы дуалы ананың батасына көпшілік «әумин» десті. Кейіннен түрлі ұлттық ойындар ойнатылып, жеңімпаздар сыйлықтармен марапатталды.
Ырысты күн әуезді ән, әдемі биге ұласты. Ал ұйымдастырушылар болса «Бұл бастамамызды дәстүрге айналдырамыз. Жастарымыз үлгі алсын» деп ақтарылды.
Қайнар ЖҰМАҒОЖА.
