Құрметті отандастар!
Баршаңызды қасиетті Рамазан айының басталуымен шын жүректен құттықтаймын!
Бұл – бүкіл әлемдегі мұсылман қауымы үшін рухани жаңару мен жаңғыру кезеңі.
Рамазан айында әрдайым ырыс пен ынтымақ, ізгілік пен мейірім салтанат құрады. Отыз күн Оразада мұқтаж жандарды қолдап, қайырымдылық көрсету игі дәстүрге айналды.
Өкінішке қарай, биылғы Рамазан айы төтенше жағдай кезеңіне тұспа-тұс келіп отыр. Сондықтан жамағатты Қазақстан мұсылмандары діни басқармасының ұсынымдарын орындауға, індетке қарсы күресте бірлік пен жауапкершілік танытуға шақырамын.
Біз, Қазақстан халқы, қанымызға сіңген қадір-қасиеттің арқасында кез келген сынақтан абыроймен өтеміз деп сенемін.
Сіздерге зор денсаулық, бақ-береке және толағай табыс тілеймін!
Алматы облысының әкімі Амандық Баталовтың барша қауымды қасиетті Рамазан айының басталуымен құттықтауы
Құрметті жетісулықтар!
Баршаңызды әлем мұсылмандары үшін қасиетті болған Рамазан айының келуімен шын жүректен құттықтаймын!
Қасиетті Рамазан айында күллі мұсылман қауымы өз жүректерін тіршіліктегі кірбіңнен тазартып, таңғы шықтай мөлдіреген тап-таза күйге енеді. Бұл мереке болашаққа деген сенімді нығайтып, күшті арттырады. Жапа шеккендер мен мұқтаж жандарға мейірім шуағы молая түседі. Қонақжайлылық пен жомарттықтың арнасы кеңиді.
Халқымыз өзінің өмір тәжірибесі арқылы ислам дінінің бірлік пен берекені, ынтымақ пен ізеттілікті молайта түсетіндігін жақсы біледі. Осы қасиетті Рамазан айы мұсылмандарды ғана емес, барлық қазақстандықтарды біріктіреді. Қазақстан халқы өзінің туған жеріне деген махаббатымен, даналығымен, еңбексүйгіштігімен, аға буынға деген шынайы құрметімен, бір-біріне деген көмек-жәрдемімен ерекшеленеді. Біздің тәуелсіз еліміз өзінің аса зор рухани байлығы, ғажайып тарихы және мәдениетімен, діни дәстүрлерімен мақтана алады.
Құрметті жерлестер!
Осы бір қасиетті айда барлық жетісулықтарға әлем жұртшылығын алаңдатып отырған індеттен аман-есен өтуге тілекшімін.
Баршаңызға рухани күш, зор сенім, мықты денсаулық, шаңырақтарыңызға береке-бірлік тілеймін.
Қасиетті Ораза айы адамдардың бір-біріне деген сүйіспеншілігін, ел азаматтарының ауызбіршілігін арттыра түсетініне сенемін.
Ораза қабыл болсын!
