Бұл жүздесу Астана қаласында «НұрОтан» партиясының қоғамдық қабылдау өткізуге арналған ғимарат құрылысы аяқталып, тұңғыш президентіміздің азаматтарды алғашқы қабылдауы еді. Әр өңірден түйткілді мәселелерді арқалай келген төрт азаматтың бірі Кәмет Мәнекеев болды. Елбасының ерекше көзқарасын бірден байқады Кәмет ата. «Жалт-жұлт етіп, жан-жағына жасын бүркігендей әсерде қаласың. Ойнақы жанары бір орында тұрмайды. Жан-жағын жіті шолып, қалт жібермей қадағалайды» – дейді Кәмет ата.
Жүздесу алдында Кәмет Мәнекеев асқан дайындықтан өтті. Қатардағы жүздесу емес, Елбасымен жүздесу. Осы себепті, «Нұр Отан» партиясы аудандық филиалының кеңесшісі Бағдат Рахимов Кәмет атаның жеткізбек ойын, айтар сөзін пысықтады. Алайда кездесу барысында бәрі де басқаша өрбіген. «Кіріп келген Елбасы: «Кәке қалайсыз?» деп қолын созды. Бұл сәтте Елбасы күнделікті көріп жүрген танысымдай өзіне тарта берді. Бұйымтай сұрады. Ауылдың жергілікті өзін-өзі басқару жүйесіне сәйкес күн санап көркейіп жатқандығын айттым. Жергілікті қауымдастық өкілдерін сайлап, кез-келген мәселені келісе шешетінімізді баян еттім. Жадымда тұрған жаттанды сөздер жайына қалды. Керісінше дәл бір таныс адамымдай еш қысылмай сөйледім. Сондай-ақ, Қаракемер ауылына қонаққа шақырдым» – дейді Кәмет ата. Жиын соңынан Елбасы өз қолымен «НұрОтан» партиясының «Елбасы партиясы» атты кітабын сыйлайды. Оның алғашқы бетіне «Мереке құтты болсын! Аман-сау, табысты болыңыз» деген ізгі тілегін де жазып берді.
Тілдесу барысында Кәмет ата тағы бір жайтты әңгімеледі. Елбасы кітапқа тілегін жазу барысында қаламының сиясы бітіп, жазу аяқсыз қалады. Осы сәт бұрынғы Астана қаласының әкімі Иманғали Тасмағанбетов төс қалтасынан қаламын шығарып беріп: «Қайтарып бересіз ғой» – деп, қалжыңдайды.
«Ай, әкім-ай, Ақ ордаға келші мен саған бірнеше қалам сыйлайын» – деп әзілге әзілмен жауап қатады Елбасы. Кәмет ата: «Бұл көрініс маған Елбасының қарапайымдылығын ұғындырды. Жүздесуден көңілді қайттым» – дейді.
Жұбайы Қамижан анамызбен бірге Кәмет Мәнекеев 7 ұл тәрбиелеп, олардан 21 немере, 8 шөбере сүйген. Бүгінде ауыл орталығынан «Айман» атты дүкен ашып кәсіпкерлік тұтқасын нық ұстаған. Ендеше, біз де Елбасы сөзімен қоштасып, қол алыстық: «Мереке құтты болсын! Аман-сау, табысты болыңыз».
Ә.МАНАСБЕК.