Аудандық ішкі саясат бөлімінің қолдауымен, "Мәңгілік ел тұғыры" қоғамдық қоры, аудандық жастар ресурстық орталығының бірлесе ұйымдастыруымен «Мен дарамын» онлайн (@enbekshikazak_zhastar инстаграм парақшасынан)байқауы өз мәресіне жетті. Жеңімпаздарды аудан әкімінің бірінші орынбасары Айбек Бидаев қабылдап, салтанатты жағдайда марапаттады.
– Кемел келешегін ойлаған ел жастарға жағдай жасайды. Тәуелсіз еліміз соқтықпалы-соқпақты кезеңдерді басынан өткерді. Баһадүр бабаларымыздың тақымы терден кеппей жүріп осынау бейбіт күнді жас буынға сыйлады. Елбасымыз Н.Назарбаев айтқандай «Тарихта біз ұялатын ештеңе жоқ». Енді еңсемізді тіктеп, дамуға бет алдық. Әрине, бой жарыстыратын емес, ой жарыстыратын заман. Жас буын осыны түсініп, тыңнан түрен салуда. Оның нәтижесін бүгінгі жарыстан көріп отырмын. Жеңімпаз үш азамат та нағыз «дара» деп айтуға әбден лайық. Жас буын батысқа қарап бой түземей, өздеріңдей дара жандар соларға үлгі болсын деген ниетпен осынау жарысты ұйымдастырдық, – деген Айбек Дүйсембекұлы әр жеңімпаздың ой-пікірін тыңдады.
Сөз алған «Мәңгілік Ел тұғыры» қоғамдық қорының төрағасы Қайнар Жұмағожа: – Әлбетте, байқауымызды кең көлемде ұйымдастыруға болар еді. Өкініштісі, қазіргі әлемді әбігерге салған індет қолбайлау болды. Дегенмен, пандемия өмір сүру қалпымызды әжептәуір өзгертті. Онлайн өткен байқауға аудан бойынша 10 үміткер қатысты. Әрбірі өз алдына дара. Дегенмен, жүзден жүйрік бар, – дей келе әр жеңімпаздың ешкімге ұқсамайтын даралығын атады.
Үшінші орын жеңімпазы бартоғайлық Билал Рабидинұлы 9 жаста. Ес білгелі пианиноға ынтық болған. Бастапқыда өз еркімен үйренген Билал қазіргі уақытта Шелектегі өнер мектебінде шығармашылығын шыңдауда. Осы аспапта түрлі күйлерді, музыкаларды еркін ойнайды.
Екінші орын қаратұрықтық Аңсар Қашағанға бұйырды. ІТ технологияны бала күнінен меңгерген 27 жасар азамат қазір білімін шетелде жетілдіруде. Арманы – ел дамуына серпіліс сыйлайтын жаңа технологияларды жасап шығару.
Жүлделі бірінші орын жеңімпазы – шелектік Айдар Берікұлы. 24 жастағы азамат алып күш иесі. Қалың темірді мойнымен майыстырып, бас сүйегімен кірпішті сындырады. Сондай-ақ, денесіне балта өтпейді.
Еркін пікір алмасудан кейін Айбек Дүйсембекұлы тың өнер иелерінің беталысына ризашылығын білдіріп, аталмыш байқауды дәстүрге айналдыруды және жеңімпаздармен ұдайы байланыста болуды тапсырды.
Өз тілшіміз