Анау өтіп кеткен тарихымызды бір сәтке кейін айналдырар болсақ, халқымыздың басына түскен нәубеттерден жеңілмей, рухымызды құлатпай өтіп келе жатқан рухты ұрпақтардың санатынанбыз. Елімізге төнген індеттен қалай шығамыз, оның қандай жолдары бар? Бұл сұрақтар елім деп еңіреген әрбір қазақ азаматының жанайқайындай болып отыр.
«Қатты жерге қақ тұрар, қайратты ерге бақ тұрар» демекші, осындай қиын сәттерде жетім бала, жесір ана, мүгедек жандарды, қоғамдағы әлеуметтік аз қамтылған жанұяларды қараусыз қалдырмау мақсатында Еңбекшіқазақ аудандық білім бөлімінің басшысы Бәтес Аманованың ұйымдастырумен, сонымен қатар Шелек ауылдық округі әкімі аппараты тарапынан көптеген жәрдем берілді. Соның ішінде елім, жерім деп жүрген жекелеген азаматтардың қосқан үлесі зор. Халқымыз жетімін жылатпаған, жесірін қаңғыртпаған тектіліктерін әлі де жоғалтқан жоқ. «Қайраңы жоқ көлден без, қайырымы жоқ ерден без» дейді атамыз қазақ. Сол текті ұрпақтың текті ұлдарының бірі Ушуров Билал мырза Шелек ауылындағы «Шелек №1 орта мектебі» КММ әлеуметтік аз қамтылған 122 отбасын азық-түлікпен қамтамасыз етті. Сонымен қатар мектептің қамқоршылық кеңесінің төрағасы, облыстық мәслихат депутаты Жангелді Осан және қамқоршылық кеңесінің мүшелері Еркебұлан Қарабалаев пен күн-түн демей еліне қызмет етіп жүрген азамат Амирлан Бақытұлы өз көмегін аямауда. Бұл күн – әлеуметтік аз қамтылған жанұялар үшін «ақ түйенің қарны жарылған» күн болды, адамдардың кеудесіне жылылық ұялады.
«Бітер істің басына жақсы келер қасына» -демекші атқарылып отырған орасан зор жұмыстың басында әрине, Шелек №1 мектебінің директоры Қырықбай Ардақ Мұхамеджанқызы тұр. Адамның жүрегінің кеңдігі, адами қасиеті ол Алладан. Басшы-ол ұйымдастырушы, қамқоршы, әділетті болған кезде ғана барлық қолға алынған шаруалар өз нәтижесін береді. Сонымен қатар, мектептің әлеуметтік педагогы Кулия Абдикасованың тарапынан аталған жанұялардың шеттетіліп қалмауын қамтамасыз ету жолында бір қатар жұмыстар атқарылды. Бүгінгі ата-аналардың қуанышы, олардың шексіз ризашылығы, білдіріп жатқан алғысы мектеп директоры Ардақ Қырықбайдың ұйымдастырушылық қабілетінің мықты екендігінің дәлелі.
Н.ТІЛЕУҚАБЫЛ
