Күндер бойынша реттелген элементтер: Бейсенбі, 13 Маусым 2019
Бейсенбі, 13 Маусым 2019 14:33

Жақсылықта жарысайық!

Осы ұранмен ау-дандағы еріктілер бі-рігіп, қасиетті Рамазан айының басынан мұқтаж жандарға көмек қолдарын созуда. Жас болса да бас болған топтың жетекшісі Данияр Нүсіпжанұлының айтуынша, осы уақыт аралығында 9 отбасыға түрлі қайырымдылық жасалып, бүлдіршіндер мен аналар қуанышқа бөленген.

Әзірге 80 адамнан құралған еріктілер бір топта бірлесіп, қаламыздағы мешіттермен келісіп, аудандық жастар ресурстық орталығымен ұғысып, жасөспірімдер және туризм орталығымен шығысып игі істерін жүзеге асырып жатыр екен. «Біз ешкімді топқа кір, ақша өткізу керек деп күштемейміз. Қайырымдылық тек ақшалай емес, сондай-ақ, заттай да болуы мүмкін. Мысалы, ойыншықтар, киім-кешек, жұмсақ жиһаз. Әркім өз еркімен, шынайы ниетімен көмектескісі келсе, мархабат. Тек бір талабымыз бар, ол – қайырымдылық сәттерінде топқа қосылған адамдардың мүмкіндігінше бәрі бірге барып, өз көздерімен көріп, жүректеріндегі иманы мен шүкіршілігін, мейірімдерін бекітсе. Мен ақша салдым, заттарды өткіздім деп қана отырмай, ақшасының немесе затының шын мұқтаждың қажетіне жарап, қуанышқа бөлегеніне куә болса. Сол арқылы, тағы да жақсылық жасауға ұмтылса деген мақсат» – дейді топ жетекшісі Данияр.

Көмектесетін отбасын алдын-ала барып көріп, олардың расымен де қайырымдылыққа мұқтаж екендіктеріне көз жеткізген соң топ мүшелері өзара ақылдасып, қай жағынан шы-ғыса алатындарын шешетін көрінеді. «Балаларды қорғау күні мерекесінде әлеуметтік жағдайы төмен, көпбалалы, жетім балаларды жинап туризм орталығының басшысы Мұрат Ақаев аға-мыздың қолдауымен көңілді концерт, ойын-сауық шарасын ұйымдастырдық. Еріктілердің арасынан ән айтып, би би-лейтіндері, аспапта ойнайтындары ешқайсысы аянып қалмай, өнер көрсетті. Бір бүлдіршіннің тұсауы сән-салтанатымен кесіліп, анасының ризашылықтан жанарына жас үйірілді. Кішігірім сыйлықтар таратылып, ойындар ойнаттық. Бастысы – жүректеріне жақсылық дәнін егіп, қайырымды адамдардың барына сендірдік. Балаларды тасымалдауды да толығымен өзіміз атқардық» деп игі істерінің шет жағасымен бөлісті Данияр Нүсіпжанұлы. Алдыға қойған мақсаттары да ауқымды аталған топтың. Ендігі кезекте Көктөбе ауылының тұрғыны ДЦП дертімен сырқат 8 жасар қыздың қозғалуы мен жүріп-тұруына қажет қоларбаға қаржы жинастырып жатыр екен. (Көмектесемін деушілер 87477946497 телефон нөмірі арқылы байланысқа шықса болады).

«Жақсылықта жарысайық!» еріктілер тобы барша қолдап, қол ұшын созып жүрген ағалары мен жанашыр азаматтарға баспасөз беттері арқылы алғыс білдіреді. Байлық, ақша, мүлік, мансап жолында емес – жақсылықта жарысайық, ағайын!

 

Алмагүл НҰҒМАН.

Published in Жастар
Copyright © 2014 Меншік иесі: ТОО "Еңбекшіқазақ" Есік қаласы, Алматы обласы № 4270-Г

 Выходные данные

Жарнама

для детей, достигших 12 лет